Halyqaralyq bilim berý korporatsııasy jańa ınjenerlik mamandyqtardy damytady
ASTANA. KAZINFORM – Qazaq bas sáýlet-qurylys akademııasynyń 45 jyldyǵyna oraı Halyqaralyq bilim berý korporatsııasy akademık Ámirlan Qusaıynov atyndaǵy bilim berý qoryn iske qosyp, jańa ınjenerlik mamandyqtardy damytady jáne qurylys salasy úshin tájirıbege baǵyttalǵan kadr daıarlaýdy keńeıtedi. Bul týraly Ǵylym jáne joǵary bilim mınıstrligi habarlady.
Búginde HBK (KazGASA) – ındýstrııalyq ekonomıka, tsıfrlandyrý jáne Qazaqstannyń ınfraqurylymdyq damýynyń suranystaryna baǵyttalǵan zamanaýı ınjenerlik bilim berý modelin qalyptastyryp otyrǵan elimizdegi jetekshi beıindi joǵary oqý oryndarynyń biri.
Mereıtoılyq is-sharalarǵa qatysqan QR Ǵylym jáne joǵary bilim mınıstri Saıasat Nurbek ınjenerlik bilim berýdi transformatsııalaýdyń mańyzdylyǵyn atap ótti.
– Kúshti bilim berý ınstıtýttary sabaqtastyqqa, berik akademııalyq dástúrlerge jáne úzdiksiz damýǵa negizdeledi. Akademııa aldaǵy ýaqytta da kadr daıarlaý, bilim men kásibı ósýdiń mańyzdy ortalyǵy retindegi áleýetin nyǵaıta beretinine senimdimin, - dedi mınıstr.
HBK bilim berý úderisine salanyń damýyn aıqyndaıtyn negizgi tehnologııalar, atap aıtqanda, BIM-modeldeý, tsıfrlyq jobalaý, jasandy ıntellekt, 3D-basyp shyǵarý jáne robottandyrý engizilgen. Bul stýdentterge biryńǵaı tsıfrlyq ortada jumys isteı alatyn jáne kúrdeli ınfraqurylymdyq jobalardy júzege asyrýǵa qatysatyn jańa býyn mamandaryn daıarlaýǵa múmkindik beredi.
Praktıkalyq daıyndyqqa erekshe nazar aýdarylady. Akademııa bazasynda FabLab jáne drondar zerthanasyn qosa alǵanda zamanaýı zerthanalar jumys isteıdi. Munda stýdentter men mamandar jobalaý, monıtorıng jáne qurylys protsesterin basqarýdyń naqty quraldaryn meńgeredi.
Akademııa ındýstrııamen belsendi ózara árekettesip, tájirıbege baǵyttalǵan oqytý formattaryn jáne qurylys kompanııalary úshin biliktilikti arttyrý baǵdarlamalaryn engizip jatyr. Negizgi bastamalardyń qatarynda sala mamandaryn zamanaýı tehnologııalarǵa, onyń ishinde seısmıkalyq qaýipsizdik sheshimderine tegin oqytý bar. Bul qalalyq ınfraqurylymdy damytý úshin strategııalyq mańyzǵa ıe.
Mańyzdy baǵyttardyń biri – akademık Ámirlan Qusaıynov atyndaǵy bilim berý qorynyń qurylýy. Qor talantty stýdentterdi, jas zertteýshilerdi jáne perspektıvaly mamandardy qoldaýǵa baǵyttalady.
– Bul qor jas talanttardy qoldaý arqyly el bolashaǵyna salynǵan ınvestıtsııa bolmaq. Biz bilim berý salasyna júıeli túrde qoldaý kórsetip, ekonomıkaǵa qajet mamandardy daıarlaýǵa jaǵdaı jasap kelemiz, - dep atap ótti Halyqaralyq bilim berý korporatsııasy Baqylaý keńesiniń tóraǵasy Aıǵazy Qusaıynov.
HBK sondaı-aq ıÝNESKO jáne ISESKO aıasyndaǵy tarıhı-mádenı murany saqtaý jobalaryn qosa alǵanda memlekettik jáne halyqaralyq bastamalardy júzege asyrýǵa qatysady. Akademııa Qazaqstanda osy baǵyt boıynsha mamandar daıarlaıtyn biregeı bilim berý baǵdarlamasyn iske asyryp, ulttyq saraptamalyq bazany qalyptastyryp otyr.
Halyqaralyq yntymaqtastyq akademııa damýynyń mańyzdy baǵyty bolyp qala beredi: HBK álemniń 30 elinen 100-den astam ýnıversıtetti biriktiretin BRAUIC konsortsıýmyna kiredi, qos dıplomdy baǵdarlamalardy júzege asyryp, stýdentterdiń akademııalyq utqyrlyǵyn keńeıtip jatyr.
Qazaqstanda 2026 jyldan bastap BIM-modeldeýdi mindetti engizý aıasynda HBK bilim berý baǵdarlamalaryn jańa salalyq talaptarǵa aldyn ala beıimdep, qurylys salasynyń tsıfrlyq transformatsııasyna qajetti quzyretterdi qalyptastyrady.
Buǵan deıin deıin habarlaǵynymyzdaı, Qazaqstanda JI quraldary bilim berý salasynda memlekettik qoldaý tapty.
