Halyqaralyq baılanys: Quzyrly organ basshylary qaı elge barady
ASTANA. KAZINFORM – Bıyl 22-25 naýryz aralyǵynda QR Kólik mınıstri Marat Qarabaev Qytaı Halyq Respýblıkasyna, atap aıtqanda Beıjiń jáne Úrimshi qalalaryna jumys sapary josparlanyp otyr. Bul týraly QR Syrtqy ister mınıstrliginiń resmı ókili Aıbek Smadııarov málimdedi.
Sapar aıasynda M. Qarabaev QHR kólik, saýda mınıstrlerimen, sondaı-aq Damý jáne reformalar jónindegi memlekettik komıtettiń, QHR Shyńjań-Uıǵyr avtonomııalyq aýdanynyń basshylyǵymen kelissózder júrgizedi dep kútilýde. Kólik mınıstrliginiń basshysy birlesken jobalar men bastamalar, sondaı-aq eki el arasyndaǵy kólik baılanystarynyń tıimdiligin arttyrý máselelerin talqylaıdy.
Al 23-24 naýryzda Jeneva qalasynda (Shveıtsarııa Konfederatsııasy) Qazaqstan Respýblıkasynyń Parlamenti Májilisiniń Tóraǵasy Erlan Qoshanov bastaǵan parlamenttik delegatsııa Parlamentaralyq odaqtyń 148-shi Assambleıasyna qatyspaq.
«Bul sessııa kópjaqty parlamentaralyq yntymaqtastyqty nyǵaıtýǵa baǵyttalǵan «Parlamenttik dıplomatııa: beıbitshilik pen ózara túsinistikke kópir salý» jalpy taqyrybymen ótedi. Sessııa qorytyndysy boıynsha qorytyndy qujatty qabyldaý josparlanýda. Sonymen qatar is-shara aıasynda parlamentaralyq yntymaqtastyq jáne parlamenttik dıplomatııany damytý máselelerin talqylaý úshin qazaq delegatsııasynyń birqatar sheteldik parlament basshylarymen kezdesýleri qarastyrylǵan», - dedi Aıbek Smadııarov.
Belgili bolǵandaı, 25-26 naýryzda Erlan Qoshanovtyń Shveıtsarııa Konfederatsııasyna resmı sapary barysynda Shveıtsarııa Ulttyq keńestiń (parlamenttiń tómengi palatasy) Tóraǵasy Erık Nýzbaýmermen jáne Syrtqy ister mınıstri Inıatsıo Kassıspen kezdespek.
Taraptar parlamentaralyq ózara is-qımyl baǵyttaryn, sondaı-aq saıası, saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń jaı-kúıi men damý perspektıvalaryn jáne halyqaralyq kún tártibindegi ózekti máselelerin talqylaıdy.
2024 jylǵy 25 naýryzda Kıpr Respýblıkasynyń Syrtqy ister mınıstri Konstantınos Kombostyń Astanaǵa resmı sapary josparlanýda. Sapar aıasynda onyń memleket basshylyǵymen, Parlament Senatynyń Tóraǵasy Máýlen Áshimbaevpen, Bas prokýror Berik Asylovpen, Syrtqy ister mınıstri Murat Nurtileýmen jáne Kólik mınıstrliginiń basshylyǵymen kezdesýleri ótedi.
Sapardyń maqsaty – Qazaqstan Respýblıkasy men Kıpr Respýblıkasy arasyndaǵy saıası jáne saýda-ekonomıkalyq salalardaǵy yntymaqtastyq máselelerin talqylaý, sondaı-aq shart-quqyqtyq bazany keńeıtý.
2024 jylǵy 26 naýryzda AQSh tarapynyń shaqyrýymen Qazaqstan Respýblıkasynyń Syrtqy ister mınıstri Murat Nurtileý sol elge resmı saparmen barady.
Sapar aıasynda AQSh Memlekettik hatshysy Entonı Blınkenmen ekijaqty kelissózderi, sondaı-aq AQSh-tyń joǵary laýazymdy tulǵalarymen kezdesýleri ótedi dep kútilýde. Onda saıası, saýda-ekonomıkalyq jáne gýmanıtarlyq salalardaǵy qazaq-amerıkandyq yntymaqtastyqtyń keń aýqymdy máseleleri talqylanady.
2024 jylǵy 29-30 naýryzda qytaı tarapynyń shaqyrýymen Qazaqstan Respýblıkasynyń Syrtqy ister mınıstri Murat Nurtileý Qytaı Halyq Respýblıkasyna resmı saparmen barady. Sapardyń maqsaty – qytaı tarapymen ekijaqty yntymaqtastyqtyń aǵymdaǵy jaı-kúıi men odan ári damý perspektıvalaryn talqylaý, joǵary jáne asa joǵary deńgeılerde qol jetkizilgen ýaǵdalastyqtardyń iske asyrylý barysyn qaraý, sondaı-aq óńirlik jáne halyqaralyq kún tártibiniń ózekti máseleleri boıynsha pikir almasý.
Sapar aıasynda QHR Memlekettik Keńesi Premeriniń orynbasary Dın Sıýesıanmen, Syrtqy ister mınıstri Van Imen ekijaqty kelissózder, sondaı-aq birqatar iri Qytaı kompanııanyń basshylarymen kezdesýler josparlanýda.
Aıta keteıik, ótken jyldyń mamyr aıynda eki memleket basshylary 2024 jyldy Qazaqstannyń Qytaıdaǵy týrızm jyly dep jarııalaǵan bolatyn. Osyǵan oraı, syrtqy saıası vedomstvosynyń basshysy Qazaqstannyń bas qonaǵy retinde QHR-daǵy Qazaqstandyq týrızm jylynyń resmı ashylý rásimine qatysady.
