Halyqaralyq baıqaý, án tańdaýdaǵy qorqynysh, tusaýkeser: Ánshi ALEM eksklıýzıv suhbat berdi
ASTANA. KAZINFORM – Úsh kúnnen keıin Jibek Joly telearnasynyń Silk Way Star megajobasynyń fınaly ótedi.
Aqtyq synda Azııanyń eń myqty jeti daýsy baq synaıdy. Olar — ALEM, ıAzmın Azız, Avtandıl Abeslamıdze, Mıshel Djozef, Chjan He Sıýan, Saro Gevorgıan jáne Madınaboný Adylova. Fınaldyq epızod 22 qarashada saǵat 20:00–de tikeleı efırde kórsetiledi. Translıatsııalar bir ýaqytta Qazaqstan, Ázerbaıjan, Tájikstan, Qyrǵyzstan jáne Mońǵolııada ótedi.
Jobada qazaqstannyń namysyn belgili ánshi Alem qorǵap júr. Ol k-pop janrynda koreı tilinde «Come back home» ánin, sıntı-pop janrynda ańyzǵa aınalǵan «Take on Me» ánin, rok stılinde 6ELLUCCI tobynyń «Qara» týyndysyn oryndap, dıapazonynyń keńdigi, sahnadaǵy erkindigi jáne emotsııany dál jetkize alýy arqyly jobadaǵy favorıt qatysýshynyń birine aınaldy.
— Bul baıqaýda ártúrli janrda án aıtýǵa tyrystym. Sahna únemi shyńdaıdy, apta saıyn jańa án izdep, jańasha stılde usynyp, óte kóp izdenis jasadym. Bala kezimnen túrli baıqaýǵa qatystym ǵoı, sondyqtan osy jobada da ómir boıy jınaǵan tájirıbemdi kórsettim deýge bolady. Al sizder jańa qyrymnan tanyp jatsańyzdar, tipti keremet! Endi Silk Way Star fınalyna buryn-sońdy bolmaǵan daıyndyqqa kiristim, — dedi ánshi, Silk Way Star qatysýshysy ALEM «BÚGІN. Live» baǵdarlamasynda.
Sonymen birge, kezekti shyǵarylymda ánshi óziniń jubaıy, tanymal model Veronıka Janǵalovamen alǵash ret sahnaǵa shyqty. Onda ALEM «Too sweet» ánin shyrqap, ekranda estelik foto-vıdeolar kórsetildi. Erekshe sát kórermenniń de, qazylardyń da júregin eljiretti.
— Maǵan qaraǵanda jubaıym kóp daıyndaldy. Veronıka birden kelisim bermedi, kameradan uıaldy. Rejısserlerdiń qolqa salýymen áreń shyqty. Sahnada men ózimdi erkin sezinemin, jubaıymdy da kúldirýge, kóńilin kóterýge tyrystym. Sodan keıin onyń da kóńili jaılandy, — dep eske alady ánshi.
Silk Way Star sahnasynda Mońǵolııadan kelgen ónerpaz Mıshel Djozef óziniń avtorlyq týyndysyn qazaqstandyq reper, Ninety One tobynyń burynǵy múshesi A.Z-men birge oryndaǵan edi. ALEM bul dýetti de joǵary baǵalady.
— Dýette Eızıdiń óz stılindegi panchtar, sózben uratyn jerleri boldy. Óte tamasha, jaqsy kórem, bul jigittiń qandaı talantty ekenin bilem ǵoı. Onyń oqý máneri de, daýsy da óte erekshe, sahnada ózin ustaýy keremet. Eızı tek jarqyn emotsııalar shaqyra alady. Sondyqtan óte qatty qýanyshty boldym. Jalpy Ninety One tobyndaǵy balalar maǵan án tańdaýda aqyl-keńes berip otyrdy, — dedi qazaqstandyq qatysýshy.
Sondaı-aq ánshi halyq ánderin jańasha oryndaýdan aıaq tartatynyn, kóp eksperıment jasaýǵa qorqatynyn moıyndady.
— Halyq ánderiniń stılin buzyp alam ba dep qorqamyn. Kóptegen baıqaýlarda ánshiler halyq ánin ózgertkeni úshin kóp synǵa ushyrap jatady. Basqalardyń eksperımentin kórgende qyzyǵamyn da, ózime kelgende qorqamyn. Sondyqtan, Silk Way Star baıqaýynda qatty tanymal emes, kóp aıtylmaǵan halyq ánin izdedim. Kompozıtor Ushqyn Jamalbekke habarlasyp, Altaı ánderin suradym. «Bolsańshy ánge qumar-aı» degen ádemi týyndyny jaryqqa shyǵardyq, — dedi ALEM.
Budan bólek, ánshi aýdıtorııany keńeıtý úshin aǵylshyn tilin úırenip, aǵylshynsha týyndylar shyǵarýy keregin de aıtty.
Suhbat sońynda tanymal ánshige Álem atty kishkentaı balaqaıdyń tusaýyn kesý mártebesi berildi. Ánshi Alem men kishkentaı Álemniń esimderiniń sáıkestigi jaı ǵana sáıkestik emes. Balaqaıdyń ata-anasy ulynyń bolashaqta Alem-deı azamat bolsyn dep yrymdap esimin qoıǵan.
— Bul men úshin jaýapkershilikke toly sát bolyp tur. Ómirimde alǵash ret tusaý kesý rásimin jasaǵaly turmyn. Endi ózim úshin, ulym úshin ǵana emes, osy kishkentaı Álem úshin de jaqsy adam bolýǵa, adal ómir súrýge tyrysamyn. Tusaý kesken adamnyń jolyn beredi ǵoı. Eń bastysy balaqaıdyń deni saý bolsyn, — dedi ánshi.
Aıta keteıik, mıllıondaǵan kórermen jınaǵan Silk Way Star megajobasy Qazaqstan Respýblıkasy Prezıdenti Teleradıokesheni men Qytaıdyń China Media Group medıakorporatsııasy arasyndaǵy kelisim aıasynda júzege asyrylyp keledi.
Alǵashqy azııalyq megajobanyń jeńimpazy aralas júıe boıynsha anyqtalady: 50% qazylar sheshimi, 50% — onlaın daýys berý. Árbir kórermen silkwaystar.org saıtynda óziniń súıikti qatysýshysyn qoldaı alady.