Halyqaralyq balalardy qorǵaý kúni: almatylyqtar merekeni qalaı toılap jatyr
ALMATY. KAZINFORM – 1 maýsym – halyqaralyq balalardy qorǵaý kúni Almaty qalasynda úlken sán-saltanatpen toılanyp jatyr. Negizgi merekelik is-shara qala turǵyndary kóp jınalǵan Ortalyq mádenıet jáne demalys saıabaǵynda ótýde. Munda qonaqtar úshin qazaq estradasynyń juldyzdary, balalar vokaldyq jáne bı ujymdary kontserttik baǵdarlamalaryn kópshilikke usyndy. Merekelik atmosferany Kazinform agenttiginiń fototilshisi sýret arqyly jetkizdi.
Kontsert «Sarmat» ansambliniń horeografııalyq nómiriniń súıemeldeýimen «Boztorǵaı» horynyń oryndaýynda «Bolashaq» balalar ánuranymen bastaldy. Sodan keıin tanymal artıster men jas talanttardyń dýet bolyp óner kórsetti. «Slavıan bazar» baıqaýynyń jeńimpazy, jas vokalıst Sherhan Arystan kishkentaı Qarlyǵashpen birge «Týǵan jer» ánin qosylyp shyrqady.
«Búgin osynda bolǵanyma jáne barlyq Almaty turǵyndary úshin osy keremet jazǵy demalys – Balalardy qorǵaýdyń halyqaralyq kúninde óner kórsetkenime qýanyshtymyn», - dedi ánshi.
Ataqty kúıshi, Qazaqstannyń halyq artısi Aıgúl Úlkenbaeva jas Yqylaspen birge Qurmanǵazynyń áıgili «Adaı» kúıin shertti. Ol talantty jastarmen árqashan óner kórsetýge daıyn ekenin aıtty.
«Jas urpaqtyń qazaq halyq ónerine degen qyzyǵýshylyǵyna rızamyn. Bul bizdiń mýzykanyń bolashaǵy bar ekenin kórsetedi», - dedi Aıgúl Úlkenbaeva.
Skrıpkashy Alýa Maqanovanyń «Mármár» jetigen ansamblimen birigip oryndaǵan «Qarlyǵash» klassıkalyq týyndysy áserli shyqty. Al, kishkentaıynan tanylǵan Erjan Maksım «Armanyńnan qalma» ánimen kópshiliktiń qoshemetine bólendi. Baqytty balalyq shaq týraly ánimen Aıgúl Úlkenbaeva, Jiger Aýypbaev, Almas Kishkenbaev, Elızat Berikova, ART Slassic toby, Shaba Orazhan jáne Sáken Maıǵazıev jastarǵa qoldaý kórsetti. Áıgili «Qazaq qyzdary» ánin KeshYOU toby jas trıo Alsý Ulyhanovamen, Aırıs Qulbaeva jáne Sofııa Balǵazınamen birigip aıtty.
«Barlyǵyn halyqaralyq balalardy qorǵaý kúnimen quttyqtaımyn. Búgin men osy sahnada bolyp, birge óner kórsetip, tájirıbemdi bóliskenime qýanyshtymyn. Shyǵarmashylyq jolda bul óte mańyzdy», - dedi Almas Kishkenbaev.
«Biz baqytty balamyz» ánin kontsertke qatysýshylar birigip oryndap, artynsha baǵdarlama balalardyń shyǵarmashylyq ujymynyń ónerimen jalǵasty. Kúniń ystyǵyna qaramastan saıabaqqa halyq kóp jınaldy. Olardyń kópshiligi, árıne, balalar. Munda olar úshin túrli is-sharalar uıymdastyryldy. Kóterińki kóńil-kúımen kelip, bı bıledi.
Almatyda balalarǵa arnalǵan merekelik is-sharalar 30 mamyrda bastaldy. Búgin de megapolıstiń barlyq 8 aýdanynda atalyp ótýde.
Buǵan deıin Prezıdent Jas Galym. Science Quest festıvaline qatysýshy balalarmen júzdesken bolatyn.
