Halyqaralyq azamattyq avıatsııa uıymynyń ókili Aqtaýǵa keldi

ASTANA. KAZINFORM – Tormodýr Tormodson halyqaralyq azamattyq avıatsııa uıymynyń (IKAO) avıatsııalyq oqıǵalardy tergeý sektsııasynyń basshysy.

- Halyqaralyq azamattyq avıatsııa uıymy (IKAO) Bas hatshysynyń tapsyrmasyna sáıkes 2024 jylǵy 29 jeltoqsanda Aqtaý qalasyna arnaıy baqylaýshy — avıatsııalyq oqıǵalardy tergeý sektsııasynyń basshysy Tormodýr Tormodson ushyp keldi. IKAO Qazaqstannyń avıatsııalyq bılik ókilderiniń tergep-tekserý barysyndaǵy ashyqtyǵy men múddeli memlekettermen ózara áreketin joǵary baǵalady, - delingen habarlamada. 

Qazir 17 halyqaralyq sarapshy Aqtaý qalasynda. 

Sondaı-aq, Kólik mınıstrligine qarasty komıssııany Marat Qarabaev basqarady. 

- Komıssııa tóraǵasynyń orynbasary, tergeý jónindegi ýákil — kóliktegi oqıǵalar men ıntsıdentterdi tergeý Departamentiniń dırektory Nurjan Malaev. Mınıstrlikke qarasty bul Komıssııa Premer-Mınıstrdiń orynbasary Qanat Bozymbaev basqaratyn Úkimettik komıssııanyń quramyna kiredi, - deıdi vedomstvodan. 

Kólik mınıstrliginiń uıytqy bolýymen qurylǵan komıssııasynyń maqsaty — avıatsııalyq oqıǵanyń sebebin anyqtap, apattyń aldyn alyp, boldyrmaý úshin usynymdar ázirleý.

- Búgin Marat Qarabaevtyń tóraǵalyǵymen shtabta 17 halyqaralyq sarapshynyń qatysýymen jınalys ótti. Komıssııa jumys josparyn naqtylady. Komıssııa oqıǵa ornyna tolyq qurammen birge baryp, apatqa ushyraǵan áýe kemesiniń elementteri jınalatyn arnaıy angardy qaraıdy. Áýe kemesiniń elementterin jınaıtyn kún birlesip bekitiledi, - degen habar aldyq mınıstrlikten. 

Eske sala keteıik, 25 jeltoqsanda Aqtaý mańynda Azerbaijan Airlines ushaǵy apatqa ushyrady. 

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bar.