Halyqaralyq atom energııasy agenttiginiń basshysy Qazaqstanǵa keledi
ASTANA. KAZINFORM – 25-27 mamyr kúnderi Atom energııasy jónindegi halyqaralyq agenttiktiń bas dırektory Rafael Grossıdiń Qazaqstanǵa sapary ótedi. Bul týraly Syrtqy ister mınıstrliginiń resmı ókili Erlan Jetibaev aıtty.
– Sapar aıasynda joǵary deńgeıdegi kezdesý, 2026-2036 jyldarǵa arnalǵan agenttikpen yntymaqtastyqty tereńdetý jónindegi Jol kartasyna jáne ǵylym men ıadrolyq medıtsına salalaryndaǵy yntymaqtastyq týraly ózge de qujattarǵa qol qoıý josparlanǵan, – dedi resmı ókil elordada ótken brıfıngte.
Buǵan deıin Qazaqstandaǵy Atom energııasy jónindegi agenttiginiń tóraǵasy Almasadam Sátqalıev AQSh-tyń Qazaqstandaǵy Tótenshe jáne Ókiletti Elshisi Djýlı Stafftpen kezdesken edi. Taraptar ǵylymı-tehnıkalyq yntymaqtastyq, tájirıbe almasý, kadrlar daıarlaý máselelerin talqylady.
Elimizde salynatyn ekinshi AES-ke Moıynqum ataýy beriledi. Ol da Balqashta ornalasady.
