Halyqaralyq «Atameken» án festıvaliniń bas júldesin kim aldy
ORAL. KAZINFORM – «Atameken» óner ordasynda QR Halyq ártisi, Memlekettik syılyqtyń laýreaty, «Otan» ordeniniń ıegeri, ánshi-kompozıtor Eskendir Hasanǵalıev ánderin oryndaýshylardyń HІІІ halyqaralyq «Atameken» án festıvali aıaqtaldy.
Án baıqaýyna Qazaqstanmen qatar kórshiles elderden kelgen barlyǵy 26 úmitker qatysyp, Eskendir Hasanǵalıevtiń týyndylaryn oryndady.
Festıval qorytyndysynda ánshi-kompozıtor, Qazaqstannyń eńbek sińirgen qaıratkeri Birjan Hasanǵalıev bastaǵan qazylar alqasynyń sheshimimen almatylyq Medet Orynbaev bas júldeni jeńip aldy.
Aqtóbe oblysynyń namysyn qorǵaǵan Mereı Samurat birinshi, astanalyq Parasat Otan men atyraýlyq Aıbar Ǵanıuly ekinshi orynǵa ıe boldy. Oraldyq Arýjan Bısembaı, qyrǵyzstandyq Darıǵa Satarova men ózbekstandyq Sevara Týlanovaǵa úshinshi júlde buıyrdy.
Batys Qazaqstan oblysy ákiminiń orynbasary Qaıyrjan Meńdiǵalıev festıval qonaqtaryna izgi lebizin bildirip, kompozıtordyń zaıyby Darıko Sopyjanqyzyna, qazylar alqasynyń múshelerine qurmet kórsetti.
Gala-kontsertte festıval júldegerlerimen qatar Ózbekstan, Qyrǵyzstan jáne Qazaqstannyń halyq artısteri Mansýr Tashmatov, Salamat Sadyqova jáne Altynbek Qorazbaevtyń óner kórsetýi erekshe áser qaldyrdy.
Saltanatty kesh Birjan Hasanǵalıev pen jergilikti ónerpazdardyń oryndaýyndaǵy «Atameken» ánimen túıindeldi.
Bıyl Eskendir Hasanǵalıevtiń týǵanyna 85, al Qadyr Myrza Áli sózin jazǵan «Atameken» ániniń jaryqqa shyqqanyna 55 jyl toldy.
BQO halyq shyǵarmashylyǵy ortalyǵynyń dırektory Máýlet Jubatovtyń aıtýynsha, ult rýhanııatynda esimderi altyn árippen jazylǵan Qadyr Myrza Áli men Eskendir Hasanǵalıevtyń shyǵarmashylyǵynan týǵan týyndy búginde qazaq jerinde ǵana emes, shet memleketterde de shyrqalyp júr.
- Eskendir Hasanǵalıevtiń 85 jyldyǵyna oraı respýblıka boıynsha kóptegen is-shara uıymdastyryldy, sonyń biri Almaty mýzeıinde «Atameken - el rýhy» kórmesi ashylyp, 80-ge jýyq qundy jádigerler qoıyldy. Respýblıka saraıynda Eskendir Hasanǵalıevke arnalǵan «Aınaldym elim» kontserti qoıylsa, Ulttyq kitaphanada Birjan Hasanǵalıevtiń «Eskendır Hasangalıev. Jızn v mýzyke. Mýzyka v jıznı» kitabynyń tusaýy kesiledi. Oblysta da osyndaı is-sharalar jurtshylyq kóńilinen shyqty. Aıtalyq, Qaratóbe aýdanynda ortalyq alańda kompozıtordy eske alyp, onlaın túrde mekemeler men aýdan halqynyń qatysýymen 1000-ǵa jýyq adam «Atameken» ánin birge shyrqady, - dedi M.Jubatov.
Eske sala keteıik, budan buryn BQO-da Qadyr Myrza Áliniń 90 jyldyǵyna arnalǵan mereıtoılyq is-sharalar máresine jetkenin jazǵan bolatynbyz.