Halyqaralyq arnaıy operatsııa: alaıaqtyqpen aınalysqan 53 adam ustaldy
ASTANA.KAZINFORM – Іshki ister mınıstrligi Ýkraına Ulttyq polıtsııasynyń Qylmystyq izdestirý departamenti men eki eldiń Bas prokýratýralarymen birlesip júrgizgen aýqymdy arnaıy operatsııa nátıjesinde Ýkraına aýmaǵynda áreket etken transulttyq uıymdasqan qylmystyq toptyń call-ortalyqtarynyń qyzmeti toqtatyldy.
31 naýryzda Dnepr qalasynda júıeli túrde Qazaqstan, Ýkraına jáne Eýropalyq odaq elderiniń azamattaryna qatysty ınternet-alaıaqtyq jasaǵan úsh call-ortalyqtyń qyzmetine tosqaýyl qoıyldy. QR ІІM-niń ýaqytyly den qoıýynyń arqasynda aýyr saldarǵa jol berilmedi.
Qylmystyq uıymnyń uzaq ýaqyt boıy jalǵan ınvestıtsııalyq kompanııalardyń qyzmetkerleri retinde áreket etkeni anyqtaldy. Qaskóıler jábirlenýshilerdi aldap, olardyń qupııa derekterine, jeke kabınetteri men bank shottaryna qol jetkizip, nátıjesinde aqshalary men tsıfrlyq aktıvterin ıemdengen.
Sonymen qatar romantıkalyq shemalar túrindegi tásilder arqyly, sondaı-aq krıptovalıýtaǵa jalǵan ınvestıtsııa usyný arqyly jasalǵan alaıaqtyq faktileri anyqtaldy. Qylmystyq áreketterdi júzege asyrý úshin tanymal ınvestıtsııalyq platformalar men krıptobırjalardy ımıtatsııalaıtyn fıshıngtik ınternet-resýrstar paıdalanylǵan.
Bul óz kezeginde alaıaqtarǵa jábirlenýshilerdiń aktıvterin tolyq baqylaýǵa alýǵa múmkindik bergen. Jedel-izdestirý is-sharalary barysynda transulttyq uıymdasqan qylmystyq toptyń uıymdastyrýshylary men barlyq belsendi qatysýshy anyqtaldy. Dnepr qalasynda bir mezette 40 mekenjaı boıynsha tintý júrgizildi.
Nátıjesinde 53 Ýkraına azamaty ustaldy, olardyń ishinde segiz negizgi kúdikti ýaqytsha ustaý ızolıatoryna qamaldy. Qalǵan qatysýshylar zańnamaǵa sáıkes jaýapkershilikke tartylady.
Aldyn ala málimetter boıynsha tintý barysynda 100 myń AQSh dollary, 90 kompıýterlik tehnıka, 125 smartfon, 6 elıtalyq avtokólik, sondaı-aq atys qarýyna uqsas zat tárkilendi. Tergeý áreketteri jalǵasyp jatyr.
Qazirgi ýaqytta ýkraınalyq áriptestermen tyǵyz ózara is-qımyl barysynda qylmystyq árekettiń barlyq epızodyn anyqtaý, qosymsha qatysýshylardy áshkereleý jáne azamattarǵa keltirilgen jalpy zalal kólemin naqtylaý baǵytynda tergeý jáne jedel-izdestirý is-sharalary júrgizilip jatyr.
Qazaqstan Respýblıkasy Іshki ister mınıstrligi halyqaralyq kıberqylmysqa qarsy kúresti jalǵastyrady. Azamattardyń senimin paıdalanyp, paıda tabýǵa baǵyttalǵan kez kelgen zańsyz áreket der kezinde anyqtalyp, qatań túrde joly kesiletin bolady.
Aıta ketelik 31 jastaǵy ShQO turǵynynan 4 keliden astam marıhýana tárkilendi.
