Halyqaralyq arbıtraj: elde bul daýlarǵa qansha qarajat qarastyrylǵan

ASTANA. KAZINFORM – Ádilet mınıstri Erlan Sársembaev halyqaralyq arbıtrajdyq talqylaýlarǵa qatysty túsinik berdi.

- Memlekettik organ bolǵandyqtan, bizdiń bıýdjet ashyq túrde jarııalanǵan. Qazirgi kezde búkil halyqaralyq arbıtarjdarǵa jáne sottarǵa qatysty arnaıy baǵdarlama bar. Jalpy, 7 mlrd teńgeden astam somany quraıdy, - dedi E. Sársembaev Parlament Májilisinde tilshiler suraǵyna jaýap bere otyryp.

Osy oraıda ol Qazaqstan 20-ǵa jýyq daýǵa qatysyp jatqanyn, bul baǵytta 7 mlrd teńge qarastyrylǵanyn naqtylady.

Sonymen qatar mınıstr Qashaǵan operatorymen arbıtraj qashanǵa deıin jalǵasatynyn aıta almady.

- Osyny talqalý qashan aıaqtalatynyn naqty eshkim aıta almaıdy. Túrli satylarda talqylaýlar bolýy múmkin. sondyqtan bul máselede naqtylanǵan merzimdi jarııalaı almaımyz, - dedi vedomstvo basshysy.

Aıta keteıik, jyl basynda Úkimet basshysy halyqaralyq arbıtrajdyq talqylaýlardyń uzaqqa sozylý sebebin túsindirdi.

Eske salsaq, Qazaqstan úkimeti munaı alpaýyttarymen birneshe jyldan beri sottasyp jatyr.

Jaqynda Qashaǵan ken ornyn ıgerýshi NCOC kompanııasy ekologııalyq aıyppulǵa baılanysty túsirgen talap aryzǵa saı, Qazaqstan halyqaralyq tórelikke qatysatyny málim boldy.