Halyqaralyq Araldy qutqarý qorynyń qurylǵanyna 33 jyl: qandaı sharýalar atqaryldy
ASTANA. KAZINFORM – Soltústik Araldyń sý kólemi 2022 jyly 18,9 mlrd tekshe metr bolsa, al 2025 jyldyń sońynda 23 mlrd tekshe metrge jetti. Bul jóninde Halyqaralyq Araldy qutqarý qorynyń Basqarma otyrysynda mamandar málimdedi.
Іs-shara shymyldyǵyn ashqan QR Premer-mınıstriniń orynbasary Qanat Bozymbaev atalǵan uıymnyń qurylǵanyna 33 jyl tolǵanyn atap ótti. Osy ýaqyt aralyǵynda qor biregeı ári qajetti aımaqtyq alańǵa aınaldy. Oǵan múshe memleketterdiń qarym-qatynasy ózara senim, syılastyq jáne seriktestik negizinde jalǵasyp keledi.
– Bul Orta Azııadaǵy sý, ekologııa, áleýmettik-ekonomıkalyq salalarda birlesken is-qımylǵa múmkindik beredi. Elderimizdiń ortaq jumysy men memleket basshylarynyń saıası erik-jigeriniń arqasynda biraz jumys atqaryldy. Transshekaralyq sý resýrstaryn basqarý jáne Aral teńiziniń jaǵdaıyn jaqsartý boıynsha turaqty seriktestikti saqtap qaldyq, – dedi Q.Bozymbaev.
Sonymen birge ol bul basqosý aldaǵy úlken jıynǵa daıyndyq ekenin málimdedi. 22 sáýirde Astanada HAQQ-ǵa múshe memleketter basshylary keńesiniń otyrysy ótpek.
Aıta keteıik Basqarma otyrysyna Qazaqstan Respýblıkasy Sý resýrstary jáne ırrıgatsııa mınıstri Nurjan Nurjigitov, Tájikstan Respýblıkasy Premer-mınıstriniń orynbasary Sýlaımon Zıezoda, Túrikmenstan Mınıstrler kabıneti tóraǵasynyń orynbasary Tangrygýly Atahallyev, Ózbekstan Respýblıkasy Prezıdentiniń keńesshisi Shýhrat Ganıev, Ózbekstan Respýblıkasynyń sý sharýashylyǵy mınıstri Shavkat Hamraev, Qyrǵyz Respýblıkasynyń Sý resýrstary, aýyl sharýashylyǵy jáne qaıta óńdeý ónerkásibi mınıstriniń orynbasary – Mınıstrlik janyndaǵy Sý resýrstary qyzmetiniń dırektory Almaz Jeenalıev, Halyqaralyq Araldy qutqarý qory atqarýshy komıtetiniń tóraǵasy Ashat Orazbaı qatysty.
Elimizdiń Sý resýrstary jáne ırrıgatsııa mınıstrligi málimetinshe, Araldy saqtaý maqsatynda keshendi shara júzege asyp jatyr. Memleketaralyq kelisimder qatań saqtalǵanynyń arqasynda sońǵy úsh jylda Soltústik Aralǵa 6 mlrd tekshe metrden astam sý quıǵan. Teńizdiń sý kólemi 2022 jyly 18,9 mlrd tekshe metr bolsa, al 2025 jyldyń sońynda 23 mlrd tekshe metrge jetti.
Bul baǵyttaǵy jumystar áli de jalǵasady. QR Sý resýrstary jáne ırrıgatsııa mınıstrligi Túrkistan jáne Qyzylorda oblystaryndaǵy sýlandyrý júıelerin jańǵyrtý jáne avtomattandyrý boıynsha 160 jobalyq-smetalyq qujattamany ázirlep jatyr.
Sonymen qatar mınıstrlik Dúnıejúzilik banktiń qoldaýymen Kókaral bógetin jańǵyrtpaq. Sonyń arqasynda teńiz deńgeıi Baltyq júıesimen 44 metrge deıin kóteriledi dep boljanyp otyr. Al sý kólemi 34 mlrd tekshe metrge jetpek.
Aıta keteıik buǵan deıin Oljas Bektenov Halyqaralyq Araldy qutqarý qorynyń basqarma múshelerimen kezdeskenin jazǵanbyz.
