Halyqaralyq «Alash» ádebı syılyǵyn kimder aldy
ALMATY. KAZINFORM - Qazaqstan Jazýshylar odaǵynyń «Kórkem ádebıet: talant pen talǵam» atty 2023 jylǵy ádebı jyl qortyndysy jıyny ótti. Oǵan elimizdiń ár óńirinen kelgen qalamgerler, aqyn-jazýshylar, ádebıettanýshy ǵalymdar, jýrnalıster qatysty.
Saltanatty jıyndy Qazaqstan Jazýshylar odaǵy basqarma tóraǵasynyń birinshi orynbasary, belgili jazýshy Nurjan Qýantaıuly ashyp, júrgizip otyrdy.
– 2023 jyly jas qalamgerlerge memlekettik qoldaý kórsetý maqsatynda tuńǵysh ret Prezıdenttik arnaýly ádebı syılyq taǵaıyndaldy. 18 ben 35 jas aralyǵyndaǵy, jas qalamgerlerge arnalǵan bul ádebı syılyq «Balalar ádebıeti», «Dramatýrgııa», «Poezııa», «Proza» nomınatsııalary boıynsha byltyr kúzde tabys etildi. Bul ádebı baıqaý bıyl da ótkizilmek. Respýblıkalyq «Aıboz» ádebı syılyǵy byltyr ekinshi márte ótkizilip, jeti nomınatsııa boıynsha syılyqtar berildi. Jastarǵa arnalǵan, budan da basqa, dástúrli «Altyn tobylǵy», «Altyn saqa», «Aıtumar» baıqaýlary byltyr da ótkizildi. Qazaqstan Jazýshylar odaǵynyń muryndyq bolýymen óńirlerde oblystyq ákimdikterdiń aqyn-jazýshylarǵa jyl saıyn ataýly ádebı syılyq taǵaıyndaý is-sharasy qolǵa alynǵany málim, – dedi Nurjan Qýantaıuly.
Іs-shara barysynda birqatar qalamgerge Qazaqstan Jazýshylar odaǵynyń halyqaralyq «Alash» ádebı syılyǵy tabystaldy. Halyqaralyq «Alash» ádebı syılyǵyn alǵan qalamgerler: aqyn Ǵaısaǵalı Seıtaq, jazýshy Ómir Káripuly, aqyn Suraǵan Rahmetuly, jazýshy Jarasbaı Súleımenov, aqyn Murat Shaımaran, ádebıettanýshy Jumat Tilepov, aqyn Nurtas Isabaev, jazýshy Tórehan Maıbas, aqyn Álııa Dáýletbaeva, jazýshy Serik Elikbaı, aqyn Erbol Alshynbaı, satırık jazýshy Berik Sadyrov, aqyn Áýbákir Smaıylov, jazýshy Tynymbaı Tólepbaı, aqyn Egeýhan Muhamádıqyzy, jazýshy Bolatbek Tólepbergen, aqyn Ǵaını Álimbekova, jazýshy Jalǵasqalı Dútmaǵambetov, aqyn Darıǵa Mushtanova, jazýshy Mombek Ábdákimuly jáne jazýshy Aleksandr Karlıýkevıch aldy.
Sonymen birge birneshe qalamger «Qazaqstannyń qurmetti jazýshysy» ataǵymen marapattaldy. Halyqaralyq «Alash» ádebı syılyǵyn alǵan qalamgerlerdiń arasynda Kazinform tilshisi, áriptesimiz Ǵaısaǵalı Seıtaq ta bar. Biz áriptesimizdi osy marapatty alýymen quttyqtaı otyra, oǵan shyǵamaryshylyq shabyt pen sáttilik tileımiz.
