Halyq jazýshysy Muhtar Shahanov ómirden ótti
ASTANA. KAZINFORM — Áıgili qazaq aqyny, dramatýrg, qoǵam qaıratkeri, Qazaqstannyń Eńbek Eri, Halyq jazýshysy Muhtar Shahanov 84 jasqa qaraǵan shaǵynda qaıtys boldy.
QR Mádenıet jáne aqparat mınıstrligi áıgili qazaq aqyny, dramatýrg, qoǵam qaıratkeri, Qazaqstannyń Eńbek Eri, Halyq jazýshysy Muhtar Shahanovtyń ómirden ótýine baılasty otbasy men týǵan-týystaryna, jaqyndaryna, qalyń qazaq jurtyna qaıǵyra kóńil aıtady.
— Muhtar Shahanov — shoqtyǵy bıik shyǵarmalar jazyp, poezııany azamattyq ustanymmen ushtastyra bilgen birtýar tulǵalardyń biri edi. Onyń óleń álemine óristi órnek, jańasha tynys ákelip, qazaq poezııasynyń damýyna ózindik jańalyq, tereńdik darytqan shyǵarmalary rýhanııatymyzdyń qundy qazynasyna aınaldy. Qoǵamdaǵy kúrdeli máselelerge ún qosyp, el men jer taǵdyryna qatysty oıly da otty pikir aıtyp, ózine ǵana tán azamattyq bıik ustanymnyń úlgisin kórsetti. Muhtar Shahanovtyń qaısar minezi, ór rýhy, ádilet jolyndaǵy tabandylyǵy men eldik múdde aldyndaǵy adaldyǵy jurt jadynda máńgi saqtalady. Marqumnyń jatqan jeri jaıly, topyraǵy torqa bolsyn! Allanyń raqymy men meıirimi joldas bolyp, rýhy peıishte shalqysyn! — delingen habarlamada.
Eske salsaq, 8 sáýirde aqyn densaýlyǵyna baılanysty emhanada jatqany belgili boldy.
Muhtar Shahanov 1942 jyldyń 2 shildesinde qazirgi Túrkistan oblysy Tóle bı aýdany Qasqasý aýylynda dúnıege kelgen. Ol kópshilikke tili jatyq, qısyny tastaı, oıy shymyr óleńderimen ǵana emes, sheshýshi sátterde batyl áreket etetin táýekelshil minezimen de tanymal. Táýelsizdik jyldary qazaq tiliniń janashyry, dil maıdanynyń sardary retinde repýtatsııa qalyptastyrǵan aqyn Parlament Májilisiniń depýtaty, Qazaqstannyń Qyrǵyz Repsýblıkasyndaǵy elshisi sııaqty jaýapty qyzmetterdi atqardy. Qazaq ádebıetindegi Muhtar esimin arqalaǵan úsh alyptyń biri sanalatyn aqyn uzaq jyldar boıy «Jalyn» jýrnalyn basqardy.
Osyǵan deıin akter, rejısser Baltabaı Seıitmamytuly dúnıeden ótkenin jazǵanbyz.