Halyq jazýshysy Qabdesh Jumadilovtiń 90 jyldyq mereıtoıy qalaı atalyp ótedi
ASTANA. KAZINFORM — Keler jyly Halyq jazýshysy, qoǵam qaıratkeri Qabdesh Jumadilovtiń 90 jyldyq mereıtoıyna oraı 84 is-shara uıymdastyrylady. Bul jaıynda Májilis depýtattarynyń saýalyna jaýap bergen Premer-Mınıstrdiń orynbasary Ermek Kósherbaev aıtty.
— Mádenıet jáne aqparat mınıstrliginiń aqparatyna sáıkes, jazýshynyń 90 jyldyq mereıtoıyn atap ótý úshin elimizdiń barlyq óńiriniń mádenıet oshaqtary men bilim berý uıymdarynda tanymdyq saǵattar, ádebı jáne shyǵarmashylyq keshter, dóńgelek ústelder, kitap kórmeleri, ǵylymı konferentsııalar, ádebı oqýlar, tárbıe saǵattary, oqyrman konferentsııalary, kitap oqý konkýrstary, jazýshy portretteri, buqaralyq aqparat quraldarynda maqalalar men estelik basylymdardy jarııalaý boıynsha 84 is-shara uıymdastyrylatyn bolady. Osyǵan qosa Qazaqstan Jazýshylar odaǵy respýblıkalyq qoǵamdyq birlestigi Qabdesh Jumadilovtiń 90 jyldyǵyna oraı respýblıka deńgeıinde issharalar uıymdastyratynyn habarlaýda, — dedi Úkimet basshysynyń orynbasary.
Onyń atap ótýinshe, eldi mekenderdegi kósheler men obektilerge jazýshynyń atyn berý qoldanystaǵy onomastıka salasyndaǵy zańnamaǵa sáıkes qarastyrylady.
— Jalpy belgilengen tártip boıynsha kósheler men mektepterge ǵylym, mádenıet jáne qoǵam qaıratkerleriniń esimderin olar qaıtys bolǵan kúninen bastap keminde bes jyl ótken soń berý kózdelgen. Qazaqstannyń halyq jazýshysy Qabdesh Jumadilovtiń 90 jyldyǵy josparǵa sáıkes óńirlerde atalyp ótiledi. Másele Mádenıet jáne aqparat mınıstrliginiń baqylaýynda bolady, — dedi Ermek Kósherbaev.
Qabdesh Jumadilov 1936 jyly 24 sáýirde QHR, Shyńjań ólkesi, Tarbaǵataı aımaǵy, Sháýeshek aýdanynda dúnıege kelgen. 2021 jyly 5 sáýirde dúnıeden ótti.
Qalamgerdiń artynda 10 roman, 20-dan astam povest, 70-ten astam shyǵarma qaldy. «Sońǵy kósh», «Daraboz», «Qazdar qaıtyp barady» syndy mol mura ádebıettiń altyn qoryna endi. Jazýshy, óz eńbekterinde qazaq halqynyń táýelsizdigi jolyndaǵy kúresin shynaıy beınelep, ult bostandyǵy úshin janyn qıǵan erler, onyń ishinde Bógenbaı, Qabanbaı, Ospan batyrlardyń azattyq jolyndaǵy kúresin tereń zerttep, olardy tek sarbazdar retinde ǵana emes, tutas halyqtyń taǵdyry úshin kúresken tulǵalar retinde sıpattaıdy.
Ol tek jazýshy ǵana emes, sondaı-aq ult taǵdyryna erekshe úles qosqan qaıratker edi. Asharshylyq kezinde totalıtarly júıeden qashyp arǵy bet asqan qarakóz qandastarymyzdyń keıingi taǵdyryna beı-jaı qaramaı, olardyń kóshi-qony, til jáne mádenıet máselelerin ashyq kóterip, ulttyq múddeni qorǵaý jolynda atsalysty. Alpysynshi jyldary Qytaıda saıası jaǵdaı kúrdelene bastaǵanda, Qabdesh Jumadil qazaq baýyrlarynyń aýyr bolashaǵyna arasha tústi. Máskeýge deıin baryp, Kremlge hat jazyp, qadastarymyzdyń kóshi-qonyn uıymdastyrý máselesin kóterdi. Nátıjesinde 1962 jyly 200 myńnan astam qandasymyzdyń tarıhı otanyna oralýyna sebepker boldy.