«Halyq zańgeri» aktsııasy: 120 000-nan astam azamat tegin quqyqtyq kómek aldy
ASTANA. KAZINFORM — «Zań jáne Tártip» ıdeologemasyn iske asyrý maqsatynda búgin elimizdiń barlyq oblys jáne aýdan ortalyqtarynda aýqymdy «Halyq zańgeri» respýblıkalyq aktsııasy ótti.
Bas prokýratýra málimetinshe, bul is-sharanyń ereksheligi – azamattardy jappaı qabyldaý múmkindiginde. Árbir nıet bildirýshi tanymal advokattar men bilikti zańgerlerden tegin quqyqtyq keńes alyp, sondaı-aq memlekettik organdardyń basshylaryna tikeleı suraq qoıý múmkindigin paıdalandy.
Aktsııany Bas prokýratýra Ádilet mınıstrligimen, jergilikti atqarýshy jáne quqyq qorǵaý organdarymen birlesip, advokattardyń, zańgerlerdiń, notarıýstardyń jáne sot oryndaýshylarynyń qatysýymen uıymdastyrdy
Osy mańyzdy áleýmettik sharanyń arqasynda 250-den astam qala men eldi mekendegi 120 myńnan astam qazaqstandyq ózderin tolǵandyrǵan quqyqtyq suraqtar boıynsha tegin ári bilikti keńes aldy. Aktsııa barysynda kelýshilerge zańdylyq pen quqyqtyq tártip máseleleri boıynsha túrli aqparattyq býkletter taratyldy. Mysaly, sheteldik koll-ortalyqtardyń azamattardyń telefondaryna jappaı qońyraý shalý, fıshıngtik siltemeler jiberý jáne joǵary tabys ýáde etý arqyly olardy «dropperlikke» (bank shottary men kartalaryn úshinshi tulǵalarǵa berý) tartýymen baılanysty ınternet-alaıaqtyqtardyń ósýine oraı, azamattardy bul qylmys túrlerinen qorǵaý boıynsha naqty nusqaýlyqtar berildi. Sonymen qatar nesıelerdi resimdeýdi buǵattaý boıynsha EGOV.kz jáne Kaspi.kz qyzmetteriniń tetikteri jan-jaqty túsindirildi.
Bıyl aktsııaǵa 4 myńnan astam zańger, advokat, notarıýs qatysyp prokýratýra, ádilet organdarynyń, ákimdikterdiń, sot oryndaýshylarynyń jáne polıtsııanyń basshylar qatysyp, rekordtyq kórsetkishke qol jetkizildi.
Qyzylordada «Halyq zańgeri» respýblıkalyq áleýmettik aktsııasy ótkenin jazǵan bolatynbyz.