«Halyq únine qulaq asatyn memleket» aıasynda aıtarlyqtaı ilgerileý bar - Aına Mysyrálimova

ASTANA. KAZINFORM – Keıingi jyldary elimizde memlekettik deńgeıde birqatar mańyzdy baǵdarlamalar men bastamalar, jobalar júzege asyrylyp jatyr. Osy oraıda bul qadamdardyń óńirlerge áseri jaıynda Májilis depýtaty Aına Mysyrálimovanyń pikirin kópshilik nazaryna usynýdy jón kórdik.

- Aına Ermekqyzy, elimizde «Halyq únine qulaq asatyn memleket» tujyrymdamasyna erekshe ekpin qoıylǵan. Osy baǵytta ilgerileý bar ma?

- Bul baǵytta Prezıdent naqty tapsyrma berdi. Memleket basshysynyń bul tujyrymdamasy qalyń el tarapynan qoldaý taýyp otyr. Atap aıtqanda, mańyzdy mindetterdiń oryndalmaýy, halyqtyń ýájin estimeı qalýy sııaqty jaǵdaılar beleń alǵany baıqaldy. Osy tapsyrma negizinen memlekettik organdarǵa arnaldy. Sheneýnikter aldyna kelgen adamnyń máselesin sheship berýge umtylýy tıis. Osy tujyrymdamanyń basymdyqtary júzege asyrylyp jatqanda, 2019 jyly memlekettik organda qyzmet etip júrdim. Jalpy, kez kelgen adamnyń ózindik kózqarasy, ereksheligi, jaýapkershiligi bolady ǵoı. Memlekettik qyzmetshilerdiń negizgi bóligi óz jumysyna jaýapkershilikpen qaraǵanymen, bir bóligi qyzmetine salǵyrt qaraıtynyn kórip júrdik. 30 jyl memlekettik qyzmettegi eńbek ótilimde osynyń bárin baıqadym. Sondyqtan jumystyń nátıjeli bolýy jeke adamnyń ózine qatysty.

Prezıdenttiń osy baǵyttaǵy tapsyrmasy jarııalanǵannan beri biraz jyl ótti. Osy aralyqta memlekettik qyzmetke jańa býyn keldi. Atap aıtqanda, «halyq únine qulaq asatyn memleket» aıasynda aıtarlyqtaı ilgerileý men ońtaıly ózgerister bar. Bul rette kúndelikti qadaǵalaý men zańnamalyq retteý yqpal etti. Sondyqtan qyzmette «kezdeısoq» júrgen adamdar áli de kemı túsedi dep oılaımyn.

Májilis depýtaty retinde biz jeke qabyldaý ótkizemiz, sondaı-aq bizge halyqtan túrli másele boıynsha ótinishter kelip túsedi. Olar kóbine zeınetaqysyn rásimdeı almaǵandar, baspana máselesi, zańsyz jumystan shyǵyp qalǵan adamdardyń jaǵdaıyna qatysty bolady.

- Aqmola oblysynda bul baǵytta ózgeris bar ma ?

- Halyqpen kezdesý kezinde árbir aýyl turǵyny depýtattarǵa óziniń problemasyn aıtyp keledi. Turǵyndardyń biraz máselesi depýtattardyń, ákimdiktiń jáne ortalyq memlekettik organdardyń birlesken is-qımylynyń nátıjesinde sheshilip jatyr. Máselen, qarjy tapshylyǵy saldarynan keıbir jobalar eskerilmeı qalady. Ony keler jylǵy bıýdjetke engizýge talpynyp jatady. Bul saladaǵy jumystardy saralaı kele, halyqtyń ótinishin oryndaýda jaqsy nátıje bar. Ózim Aqmola oblysynyń aýdandaryn aralaǵan kezde, jobalardyń birtindep júzege asyp jatqanyn kórip júrmin. Atap aıtqanda, osyǵan deıin jobalar júzege asyrylǵanymen, nysandardyń sapasyz salynǵany jıi bolatyn. Qazir bul baǵytta jaqsy nátıje barshylyq. Jumysyna jaýapty merdigerler de kóbeıdi. Sáıkesinshe, aýdandarǵa barǵan kezde, jeke qabyldaýǵa jazylatyn, shaǵymy kóp adamdar azaıyp jatqanyn baıqadym. Munyń ózi ońtaıly ózgeris bar ekenin bildiredi, ıaǵnı jergilikti ákimdikter aldyna qoıǵan mindetti jaýapkershilikpen oryndap jatqanyn ańǵartady. Sondyqtan «halyq únine qulaq asatyn memleket» tujyrymdamasyn halyqta ta, sheneýnikter de jaqsy túsindi dep oılaımyn. Qazir memlekettik organdarǵa resmı ótinish beretin eOtinish júıesi de ońtaıly áser etip otyr.

- Depýtattyq saýaldarǵa memlekettik organdardyń jaýabyn qalaı baǵalar edińiz?

- Árıne, bizdiń saýaldarǵa syrǵytpa jaýaptar keletin jaǵdaılar az emes. Biraq olardy da túsinýge bolady, sebebi jumys aýqymyna baılanysty keıde egjeı-tegjeıli qarastyra almaı jatady. Degenmen, vedomstvolar bizdiń saýaldarǵa beretin jaýaptardyń sapasyn kóterýi tıis dep sanaımyn.

- Jyl sońyna qaraı depýtattar óńirlerdi aralaýǵa shyǵady. Sol bir apatada Aqmola oblysyndaǵy neshe aýdanǵa baryp úlgeresiz?

- Ol kezde 10-ǵa jýyq aýdanǵa barýǵa tyrysamyn. Oblystaǵy eldi mekenderdi aralaǵan kezde, «Aýyl - El besigi» baǵdarlamasynyń, «Jaıly mektep» ulttyq jobasy, «Aýylda densaýlyq saqtaýdy jańǵyrtý» ulttyq jobasy jáne basqa da baǵdarlamalardyń júzege asyrylý barysyna erekshe nazar aýdaramyz. Májilistiń VIII saılanǵan quramy 1,5 jylda zańnamaǵa biraz ózgeris engizip, jol salatyn kásiporyndarǵa aıtarlyqtaı qolaıly jaǵdaı jasaldy. Osy oraıda byltyr jáne bıyl eldi mekenderde jol men sý ınfraqurylymyn tartyp jatqan jaqsy kásiporyndardy baıqadyq. Bızneste namysy men jaýapkershiligi bar azamattar barshylyq. Degenmen, keıbir jaǵdaılarda jobalardy qarjylandyrý tolyq bolmaı jatady, sonyń saldarynan olardy aıaqtaý keler jylǵa shegerilip otyrady. Negizinen, óńirde jol boıyndaǵy aýyldar damyp keledi. Oblystaǵy birqatar aýdanda týrızm salasy men aýyl sharýashylyǵyn damytýdyń múmkindigi zor. Astananyń jaqyn turǵanyn eskere otyryp, birtindep osy eldi mekenderge keletin týrıster kóbeıe beredi.

- Turǵyndar óz eldi mekenderinde qanshalyqty belsendi?

- Qazir oblystarda mańyzdy sheshimderge azamattar belsendi túrde qatysyp jatyr. Keıbir óńirlerde sarapshylyq qaýymdastyqtardyń jáne qoǵamdyq keńesterdiń yqpaly mol. Turǵyndardyń ózderi eldi mekenniń ómirine beı-jaı qaramasa, bul aýyldar gúldene túsetini túsinikti. Osy oraıda sheshim qabyldaýda azamattardyń áseri bar ekenin kórip júrmiz. Óńirlerge baryp kelgennen keıin, biz tıisti taldaý jasaımyz. Sonyń nátıjesinde ózgeristerdi baıqaımyz.

- Siz biraz ýaqyt óńirdegi ishki saıasat jáne áleýmettik sala baǵytynda qyzmet ettińiz. Maman tapshylyǵy máselesine qatysty pikir aıtsańyz?

- Halqymyz balasyn múmkindiginshe joǵary oqý ornyna túsirýge tyrysady. Biraq solardyń kóbi eńbek naryǵyndaǵy suranysy az mamandyqtardy tańdap jatyr. Sondyqtan Memleket basshysy 2025 jyldy Jumysshy mamandyqtary jyly dep jarııalady. Naqty bir kásipti jaqsy meńgergen jumysshylar tapshylyǵy bar. Bul turǵyda jumysshylardyń ımıdjin kóterýge qatysty aýqymdy jumystardy atqarǵan jón. Máselen, damyǵan elderde jumysshylardyń jalaqysy joǵary jáne osy adamdar qoǵamda joǵary baǵalanyp otyr. ıAǵnı kóshe tazalyǵyndaǵy, sý tartý, aýyl sharýashylyǵynda jáne basqa da salalardaǵy myqty jumysshylarǵa joǵary aılyq tólenedi. Atap aıtqanda, kolledjderdi damytýǵa erekshe ekpin qoıý kerek. Elimizde bilim berý salasyna bolashaqta «Ulttyq qor – balalarǵa» jobasy da jaqsy serpin beredi dep oılaımyn. Bıyl 1 aqpanda 7 mln-ǵa jýyq balaǵa 100 dollardan aýdarylǵanyn bilesizder. 2025 jyly osydan joǵary somada ár balaǵa qarajat qarastyrylady dep eskerilgen. ıAǵnı, osy arqyly keleshekte kámeletke tolǵan ár jasqa oqýyna qajet qarajat jınalyp turady. Meniń oıymsha, ata-analar osydan bólek ózderi ár balasynda jınaq bolǵanyn qarastyrýy kerek. Bul rette, «Keleshek» biryńǵaı erikti jınaqtaý júıesi tyń serpin beredi degen oıdamyn. Jastar aıyna shamaly bolsa da qarjysyn únemdep, óziniń jınaǵyna nazar aýdarǵany jón. Negizi, biz qarjy jınaqtaý mádenıetin qalyptastyrýymyz qajet. Shamań jetpeı jatsa, shyǵyny kóp toı ótkizýdiń nemese qymbat gadjetterdi nesıege alýdyń keregi qansha?! Sondyqtan balalardyń bolashaǵyna qarjy jınastyrý jaǵyna kóńil bólgen jón.

- Áńgimeńizge rahmet!