Halyq sý basqan óńirlerge qol ushyn sozdy – Oljas Bektenov
ASTANA. KAZINFORM – Premer-Mınıstr Oljas Bektenov tasqynmen kúres, onyń saldaryn joıý jáne obektilerdi qalpyna keltirý jumystary týraly aıtty.
«Bıylǵy tasqyn táýelsizdik tarıhyndaǵy eń iri tabıǵı apattardyń biri boldy. Jaǵdaıdy Memleket basshysy óziniń jeke baqylaýynda ustap otyr. Apatpen kúresýge qoldaǵy barlyq resýrstar men kúshter jumyldyryldy, 60-tan astam eldi mekennen 120 myńnan astam adam evakýatsııalandy. Myńdaǵan adam dúnıe-múlki, bıznesi men tabys kózinen aıyryldy. Elimizdiń agrarlyq sektory da zardap shekti deýge bolady. Memlekettik organdardyń, iri bıznes ókilderiniń, belsendi azamattar men volonterlerdiń birlesken kúsh-jigeriniń arqasynda aýqymdy jumys júrgizildi», - dedi Oljas Bektenov Úkimet otyrysyn qorytyndylaı kele.
Sonymen qatar Úkimet basshysy tasqynnyń zardabyn shekken jandarǵa medıtsınalyq jáne psıhologııalyq kómek kórsetilgenin aıtty.
«Adamdar ýaqytsha baspanamen, tamaqpen jáne kúndelikti ómirge qajetti zattarmen qamtamasyz etildi. Búkil halyq bolyp Memleket basshysynyń úndeýine qulaq asyp, sý basqan óńirlerge qol ushyn sozdy. Bárine járdem berilip, zardap shekkenderdiń barlyǵy birjolǵy tólem aldy. Qıraǵan jáne sý basqan dúnıe-múlikke ótemaqy tólendi. Sonymen qatar 9 myńnan astam úıdi jóndeýge qarajat tólenip, naryqtan 6 myńǵa jýyq páter men úı satyp alyndy. Qurylys jáne jóndeý jumystary joǵary qarqynmen júrgizildi», - deıdi O. Bektenov.
