Halyq sany 10 myńnan asatyn aýyldardy qalaǵa aınaldyrýǵa bola ma

ASTANA. KAZINFORM – 3 jyl boıy halyq sany 10 myńnan asatyn aýyldardy qalaǵa aınaldyrýǵa bolady. Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.

Otyrys barysynda Premer-Mınıstr Oljas Bektenov mınıstrden: «Sońǵy jyldary turǵyn sany 50 adamǵa jetpeıtin aýyldar taratyldy. Adamdar endi iri eldi mekenderge kóship jatyr. ıAǵnı, bul rette halyq tyǵyz ornalasqan aýyldardyń mártebesin qaıta qaraý qajet bolady. Osyndaı aýyldardyń sany qansha jáne bul baǵytta qandaı jumys atqarylyp jatyr?», - dep suraǵan edi.

Nurlan Baıbazarovtyń aıtýynsha, qazir elimizde 10 myńnan astam turǵyny bar 112 aýyl bar.

«Onyń ishinde 18 eldi mekende 30 myńnan asa adam turady. Olardyń mártebesin ózgertý úshin zańnamada tetikter bar. Mysaly, 3 jyl boıy halyq sany 10 myńnan asyp otyrsa, onda oblys máslıhatynyń deńgeıinde atalǵan aýyldardyń mártebesin ózgertý, ıaǵnı qalaǵa aınaldyrý quqyǵy bar. Bul zań 2021 jyldan bastap qoldanysqa engen bolatyn. Qazirgi tańda oblys ákimdikteri máslıhattardyń ótiniminderin qarastyryp jatyr. Biraq áli naqty sheshim qabyldanbaǵan, jumys júrgizilýde», - dedi ol.

Osy oraıda Úkimet basshysy bul mindet emes, turǵyndardyń quqyǵy ekendigin naqtylap surady.

«Iá, 3 jyl boıy halyqtyń sany 10 myńǵa kóbeıse, onda qalaǵa aınaldyrý múmkindigi bar. Tıisti oblys ákimdikteri sheshim qabyldaıdy», - dep atap ótti Nurlan Baıbazarov.