Halyq salalyq dárigerlerge jazylý úshin ábigerge túsedi – depýtat
ASTANA. KAZINFORM — Quryltaıdyń jalpy otyrysynda depýtat Arman Janseńgirov Densaýlyq saqtaý mınıstri Aqmaral Álnazarovaǵa konsýltatıvtik-dıagnostıkalyq kómekti kútý merzimderine qatysty depýtattyq saýal joldady.
Onyń sózinshe, ambýlatorııalyq jaǵdaılarda beıindi mamandardyń konsýltatsııalaryn jáne dıagnostıkalyq zertteýlerdi kútý merzimderi tym uzaq.
– 2026 jyly № QR DSM-37 buıryqqa engizilgen ózgeristerde birqatar jaǵymdy jańalyqtar bar. Beıindi maman patsıentti tekserýlerge jáne áriptesterine jiberýge quqyly, qabyldaý kesteleri 60 kúnge jarııalanady, qyzmet kórsetýge ýaqyt normatıvteri belgilendi. Sonymen qatar beıindi mamandardyń qoljetimdiligi azamattar ótinishteriniń negizgi sebebi bolyp qala beredi. 2026 jyldyń birinshi jartyjyldyǵynda 2 925 shaǵym tústi. Olardyń kóbi Mańǵystaý, Shyǵys Qazaqstan, Qaraǵandy, Aqmola oblystarynan jáne Astana qalasynan tirkeldi, – dedi depýtat.
Onyń aıtýynsha, dárigerge jazylýdyń biryńǵaı shekti merzimi normatıvtik turǵyda bekitilmegen. Saldarynan aýyryp turǵan adam dárigerge bir aıdan keıin de qarala alýy múmkin. Sonymen qatar maman jetispeýi naýqastardyń der kezinde medıtsınalyq kómekti ala almaýyna sebep bolady. Odan bólek, mynadaı túıtkilder bar:
• «Úshten aspaıtyn» joldama shekteýi qosarlanǵan patologııasy bar patsıentterdiń qajettilikterin eskermeıdi;
• mamannyń patsıentti qaıta qabyldaýǵa jazý quqyǵy «aýyrý jalǵasýda» degen nátıjege baılanystyrylǵan. Bul nátıjeni formaldy túrde qoıý qaýpin týǵyzady;
• dıspanserlik esepte turǵandar úshin beıindi dárigerge tikeleı jazylý tek mobıldi qosymshalar arqyly qoljetimdi. Bul egde jastaǵy jáne aýyl turǵyndarynyń qabyldaýǵa jazylýyn qıyndyq týǵyzady;
• óńirler bólinisindegi naqty kútý merzimderi jarııalanbaıtyny anyqtaldy.
Atalǵan máselelerdi sanamalaı kele, depýtat usynystaryn de jetkizdi:
• qaǵıdalarda josparly kómekti kútýdiń biryńǵaı shekti merzimin, onkologııalyq aýrýǵa kúdik bolǵan kezde jáne balalar úshin qysqartylǵan merzimderdi bekitý;
• qosymsha oryndaýshyǵa qaıta baǵyttaýmen merzimderdi avtomatty baqylaýdy, jarııa monıtorıngti engizý jáne shtattyq normatıvter men tarıfterdi qaıta esepteý;
• joldamalar kólemin klınıkalyq hattamamen aıqyndaý jáne qaıta jazylýdyń emdeý nátıjesine baılanystyrylýyn alyp tastaý;
• beıindi dárigerge tikeleı jazylýdy tirkeý ornyna, koll-ortalyqqa taratý.
Sóziniń qorytyndysynda ol jaýapty zańnamada belgilengen merzimde jazbasha berýdi surady.
Aıta keteıik, buǵan deıin elimizde medıtsınalyq-áleýmettik saraptamadan ótý úshin elektrondy kezek engizilip jatqanyn jazǵanbyz.
