Halyq pen Prezıdentten keshirim suraımyn – Qaırat Satybaldy kinásin moıyndady

ASTANA. KAZINFORM – Qaırat Satybaldy sotta sóılegen sózinde óziniń qateligin moıyndaıtynyn málim etti.

«Kez kelgen azamat úshin memleket múddesi bárinen bıik bolýǵa tıis. Halqymyzda sóz bar, «jańylmaıtyn jaq, súrinbeıtin tuıaq bolmaıdy» degen. Men jasaǵan qatelikterimdi moıyndaımyn. Maǵan qatysty qylmystyq is boıynsha men organdarǵa kómektesip, búkil zańsyz qarjyny qaıtaryp jatyrmyn. Elden zańsyz shyǵarylǵan aktıvterdi qaıtarý – eldiń yrysyn ózine qaıtarý dep bilemin. Bul – Memleket basshysy qabyldaǵan mańyzdy sheshimderdiń biri. Mundaıdy kórgen soń, endigi jerde eshkim eldiń yrysyn syrtqa shashpaıdy», - dedi Q.Satybaldy.

Sonymen qatar ol memlekette sońǵy jyldary bolyp jatqan oń ózgeristerdi kórip-bilip otyrǵanyn aıtty.

«Osyndaıda bárimiz bir jaǵadan bas, bir jeńnen qol shyǵaryp, birge jumys isteýimiz kerek. Men Prezıdentimizdiń júrgizip otyrǵan saıasatyn tolyqtaı qoldaımyn. Zańsyz kapıtaldyń bári – tıynyna deıin elge qaıtarylyp, zań men tártip bolýǵa tıis! Halyqtan, kezinde tizem batqan, aqysyna kirgen adamdardan jáne Memleket basshysynan keshirim suraımyn», - dedi ol.

Onyń sózinde osyǵan deıin barlyq istegen is-áreketterin saralaýǵa, oı qorytýǵa ýaqyt jetkilikti bolǵany atap ótilgen. Bul rette jibergen qateligin jáne kinásin tolyqtaı moıyndaı otyryp, istegen isine ókinetini aıtylǵan.

Q. Satybaldynyń aıtýynsha, tergeý oryndarymen birlesip jumys júrgizildi.

«Memleket basshysynyń zańsyz aktıvterdi memleketke qaıtarý isi boıynsha júrgizip jatqan saıasatyn tolyqtaı qoldaımyn. Meniń istegen isim basqalarǵa durys sheshim shyǵarý úshin sabaq bolady dep oılaımyn. Aǵattyq istep, renjitken adamdardan keshirim suraımyn», - dedi ol.

Budan buryn habarlanǵandaı, Qaırat Satybaldyǵa qatysty úkim ózgerdi. 

Bul rette, bas bostandyǵynan aıyrý túrindegi jazanyń ótelmegen bóligi 3 jyl 3 aı 7 kún merzimge bas bostandyǵyn shekteýge aýystyryldy.