Halyq óz tańdaýyn jasady – Erlan Qoshanov
ASTANA. KAZINFORM – AES salý jónindegi referendým aıaqtalyp, daýys berý qorytyndysy shyqty. Májilis tóraǵasy Erlan Qoshanov Facebook-tegi jazbasynda keshe ótken respýblıkalyq referendým demokratııanyń is júzindegi kórinisi ekenin, saıası mádenıet osylaı qalyptasatynyn jazdy.
«Búgin Ortalyq referendým komıssııasy daýys berýdiń aldyn ala qorytyndysyn jarııalady. Soǵan sáıkes, saılaýshylardyń 71,12%-y AES qurylysyn qoldady. Exit poll qorytyndysy da osyǵan jaqyn nátıje kórsetti.
Jańa saıası jaǵdaıda Táýelsizdigimizdiń 33 jyldyq tarıhyndaǵy úsh referendýmnyń ekeýi Memleket basshysy Qasym-Jomart Toqaevtyń bastamasymen ótti. Sóz joq, jańa saıası mádenıet dál osylaı qalyptasady. Ár azamat qoǵam úshin mańyzdy máselelerdi sheshý isine tikeleı aralasyp, el taǵdyryna óziniń qatysty ekenin sezinedi. Bul – demokratııanyń is júzindegi kórinisi.
Depýtattar únemi óńirlerdi aralap júr. Biz qoǵamdyq sana ózgerip, jańa saıası mádenıet qalyptasyp kele jatqanyn kórip otyrmyz. Turǵyndar kez kelgen taqyryp boıynsha óz ustanymyn ashyq aıtyp, ony barlyq deńgeıde batyl qorǵaýda. Bul – Prezıdenttiń Ádiletti Qazaqstandy qurýǵa baǵyttalǵan saıası reformalar baǵdarynyń basty nátıjesi.
Referendým qorytyndysy – qoǵamdaǵy kóńil-kúıdiń naqty kórinisi. Halyqtyq shtab barlyq óńirge baryp, myńdaǵan kezdesý ótkizdi. Sonyń barysynda jalpy qoǵam el bolashaǵy úshin AES salýdyń mańyzyn túsinip otyrǵanyna kóz jetkizdi. Kásipkerler, sharýalar, kenshiler, jumysshylar, jastar, muǵalimder, dárigerler jáne basqalar da ekonomıkasy damyǵan elde ómir súrgisi keledi. Olardyń barlyǵy munyń kilti energetıkalyq táýelsizdik ekenin jáne bul úshin AES salý qajet ekenin jaqsy túsinedi.
Beıbit atom – ınnovatsııalyq turǵyda senimdi, qaýipsiz, ekologııalyq taza energııa kózi. Bul – ǵylymda, tehnıkada, óndiriste, aýyl sharýashylyǵynda jáne ózge de kóptegen salada kókjıegimizdi keńeıtetin álemdik trend.
Osylaısha, halyq óz tańdaýyn jasady. Barsha qazaqstandyqty elimizdiń jańa tarıhynda erekshe oryn alatyn osy aıtýly oqıǵamen shyn júrekten quttyqtaımyn. Halyqtyq shtabtyń barlyq múshelerine – saıası partııalardyń, qoǵamdyq birlestikterdiń, kásipodaqtar men qaýymdastyqtardyń ókilderine alǵys aıtqym keledi. Sizder azamattarymyzdyń ıgiligi úshin asa mańyzdy ister atqardyńyzdar!», - dep jazdy E. Qoshanov.
Eske sala keteıik, buǵan deıin Ortalyq referendým komıssııasynyń tóraǵasy Nurlan Ábdirovtiń Qazaqstandyqtardyń 71,12 paıyzy referendýmda AES qurylysyn qoldap daýys bergeni týraly aıtqanyn jazǵan edik.
