Halyq kútken mańyzdy ózgerister naqtylandy — depýtat

QYZYLORDA. KAZINFORM — Qyzylordada ótken V Ulttyq quryltaıda Parlament pen jalpy saıası júıedegi halyq kútken mańyzdy ózgerister naqtylandy. Bul týraly Parlament Májilisiniń depýtaty Nıkıta Shatalov aıtty.

Memleket basshysy atap ótkendeı, bir palataly Parlamentke kóshý týraly bastamany halyq qoldap otyr. Muny halyq arasynda júrgizilgen saýalnamalar jáne jumys tobynyń qorytyndysy qýattaǵan. 

— Prezıdenttiń bir palataly Parlamentke kóshý týraly bastamasy saıası aýqymdy reformalardyń zańdy jalǵasy desek, artyq aıtqanymyz emes. Odan bólek, elimizde vıtse-prezıdent laýazymy paıda bolmaq. Oǵan keńaýqymdy mindetter júkteletini belgili boldy. Atap aıtqanda, vıtse-prezıdent halyqaralyq forýmdar men kelissózderge Qazaqstannyń atynan, al Parlamentte prezıdenttiń atynan qatysady. Qazaqstan halqy assambleıasy men Halyq keńesin biriktirý — mańyzdy qadam. Bul eki qurylym bir-birin tolyqtyrmaıdy. Biraq bulardyń birligi azamattyq ókildiktiń sheshim qabyldaýdaǵy mańyzyn arttyrady. Zań shyǵarý protsesi ashyq ári básekege qabiletti bola túsedi. Tsıfrlandyrý júıesi men ınfraqurylymy baǵytyndaǵy jumys qarqyny kúsheıse, derekterdi óńdeý ortalyǵy júıesiniń ótkizý qabileti artyp, tsıfrly qyzmetterdi qoldaný aıasy keńeıedi. Bul óz kezeginde elimizdiń ekonomıkasyna da áser etedi, — dedi depýtat.

Aıta keteıik, depýtattar men partııa fraktsııalarynyń jetekshileri jaqynda aımaqtardy aralap, saılaýshylarmen kezdesip qaıtty. Olar Prezıdentke halyqtyń reformany qoldap otyrǵanyn jetkizgen.

Budan buryn Qasym-Jomart Toqaev vıtse-prezıdent laýazymyn bekitýdi usyndy.