Konstıtýtsııa 1 shildeden bastap resmı túrde kúshine enedi

ASTANA. KAZINFORM — Bul jóninde Prezıdent Qasym-Jomart Toqaev Konstıtýtsııany qabyldaýǵa arnalǵan saltanatty jıynda aıtty. Bul týraly Aqordanyń baspasóz qyzmeti habarlady. 

 — Búgin barshańyz tarıhymyzdaǵy asa mańyzdy, mán-maǵynasy aıryqsha, el ómirinde óshpes iz qaldyratyn oqıǵanyń kýási boldyńyzdar.

Men Memleket basshysy retinde búkil halyq atynan Ata zańymyzǵa qol qoıdym. Sonymen qatar Konstıtýtsııany iske asyrý jónindegi sharalar týraly Jarlyqqa qol qoıdym.

Endi Halyq Konstıtýtsııasy 1 shildeden bastap resmı túrde óz kúshine enedi. Al Konstıtýtsııa kúnin memlekettik mereke retinde ulttyq deńgeıde jyl saıyn 15 naýryzda atap ótetin boldyq.

Elimizdiń barsha halqyna Ata zańymyz qutty bolsyn degim keledi, — dedi Prezıdent.

Memleket basshysy Konstıtýtsııa — memleketimizdiń uzaqmerzimdi maqsat-muratyn aıqyndaıtyn, ultymyzdyń keleshek taǵdyryna tikeleı áser etetin tarıhı qujat ekenin aıtty.

— Bul — shyn máninde Halyq Konstıtýtsııasy. Onyń jobasy shamamen eki jyl buryn pysyqtala bastady. Keıin muqııat talqylanyp, zerdelenip jazyldy. Konstıtýtsııamyz — tabandy ujymdyq eńbektiń nátıjesi.

Biz búgin bir el bolyp ult jylnamasynyń jańa mejesine óttik, túbegeıli ózgeristerdiń sapasy jáne mazmuny erekshe biregeı kezeńine aıaq bastyq.

Keshe ǵana elimizde jalpyhalyqtyq referendým oıdaǵydaı ótti. Oǵan jurtshylyq jappaı belsene qatysty.

Azamattarymyz óz tańdaýyn jasady, halqymyz bir kisideı jańarý men jańǵyrý jolyn jaqtap daýys berdi. Halqymyz Otanymyzdyń bolashaǵy úshin óte jaýapty sátte jumyla eńbek etti, ortaq iske orasan zor úles qosty. Uly Abaıdyń «Birlik — aqylǵa birlik» degen ósıet sózi osyndaı kezde aıtylǵan bolsa kerek, — dedi ol.

Aıta ketelik Prezıdent QR Konstıtýtsııasyn iske asyrý jónindegi sharalar týraly Jarlyqqa qol qoıǵan edi.