Halyq kóbirek oqý úshin Danııa kitapqa salynatyn 25% salyqty alyp tastaıdy

ASTANA. KAZINFORM — Árbir tórtinshi 15 jastaǵy jasóspirim Danııada qarapaıym mátindi túsinýge qınalady. Mundaı derekterdi Ekonomıkalyq yntymaqtastyq jáne damý uıymy (EYDU) jarııalady, dep habarlaıdy Euronews. 

Danııa úkimeti azamattardy kóbirek kitap oqýǵa yntalandyrý maqsatynda kitap satý kezindegi 25 paıyzdyq salyqty alyp tastaıtynyn málimdedi.

Danııanyń mádenıet mınıstri ıAkob Engel-Shmıdt bul ózgeristiń arqasynda dúken sórelerinen kóbirek kitap satylatyn bolady degen úmitin bildirdi. Bul bastama memleketke jylyna shamamen 330 mıllıon kronǵa (44 mıllıon eýro) túsedi, biraq Engel-Shmıdt muny eldiń mádenı bolashaǵyna salynǵan ınvestıtsııa dep atady.

— Bul — men mádenıet mınıstri retinde kópten beri qolǵa alǵan jumysym. Sebebi biz sońǵy jyldary kúsheıip kele jatqan oqý daǵdarysyna núkte qoıýdy qalasaq, barymyzdy salýymyz kerek dep esepteımin. Bul sheshimge qýanyshtymyn. Kún saıyn mundaı aýqymdy qarajatty dattardyń mádenıetine jáne tutynýyna ınvestıtsııalaý qajettigine áriptesterimdi ılandyra bermeısiń, — dedi Engel-Shmıdt Ritzau aqparat agenttigine bergen suhbatynda.

Kitap satýǵa salynatyn 25 paıyzdyq salyqty alyp tastaý sheshimi EYDU-nyń alańdatarlyq statıstıkasynan keıin qabyldandy. Sońǵy esepke sáıkes, 15 jastaǵy dat balalarynyń 24 paıyzy qarapaıym mátindi túsinbeıdi. Bul kórsetkish on jyl burynǵydan tórt paıyzǵa joǵary.

Saýalnamalar da jasóspirimderdiń kitap oqýdy azaıtyp ketkenin kórsetip otyr. Sarapshylar muny balalardyń zeıin qoıýdaǵy qıyndyǵymen jáne túrli alańdatatyn faktorlarmen baılanystyrady. Eń aldymen áńgime gadjetterge táýeldilik týraly bolyp otyr.

Aıta keterligi, Norvegııada kitap satýda múlde salyq salynbaıdy. Fınlıandııada kitapqa salyq mólsheri — 14%, al Shvetsııada bar-joǵy — 6%. 

Álemdegi eń erekshe kitaphanalardyń biri Qytaıdaǵy Mıanhýa kitaphanasy týraly jazǵan edik.