Halyq keńesiniń saıası salmaǵy bar ma — saıasattanýshy jaýaby
ASTANA. KAZINFORM — Saıasattanýshy Indıra Rystına Jibek Joly telearnasynyń «Búgin LIVE» baǵdarlamasynda Halyq keńesi ınstıtýtynyń atqaratyn jumysy men quqyqtaryn túsindirdi.
— Eger Quryltaı zań shyǵarýshy bıliktiń negizgi saıası ınstıtýty bolsa, Halyq keńesi — konsýltatıvtik organ. Onyń saıası júktemesi Quryltaıdikindeı emes, Halyq keńesi bıliktiń tarmaǵyna jatpaıdy. Bul — konsýltatıvtik organ. Biraq Halyq keńesiniń birqatar quqyǵy bar. Ol zańǵa bastamashy bola alady. Buryn mundaı quqyq Úkimet, Parlament jáne Prezıdentte boldy. Endi zań shyǵarýǵa tórtinshi bastamashyl sýbekt retinde Halyq keńesi quryldy. Sonymen birge, ol jalpyulttyq referendým ótkizý boıynsha da bastamashy bola alady. Osy tusta Halyq keńesiniń saıası salmaǵyn baıqaýǵa bolady, — dedi saıasattanýshy.
Sonymen qatar, ol zańǵa bastamashy bolý quqyǵy Halyq keńesine ne beretinin aıtty.
— Halyq keńesine taǵaıyndalǵan azamattar ártúrli stratalardyń ókilderi bolady. Mysaly, etnomádenı birlestikterdiń, qoǵamdyq keńesterdiń, qoǵamdyq uıymdardyń t. b. ókilderi Halyq keńesine taǵaıyndalady. Qoǵamnyń ártúrli qatparynan shyqqan 126 múshe ekologııa, balalar quqyǵy t. b. san alýan máseleni kóteredi. Olar óńirlerdegi ártúrli túıtkildi kóterip, zańǵa aınaldyrý úshin usynady. Ary qaraı Quryltaı jumysqa ala ma, álde qosymsha óńdeı me, sheshedi. Eń bastysy, Halyq keńesi jurt máselesin kóterip, jetkizedi, — dedi Indıra Rystına.
Aıta keteıik, buǵan deıin saıasattanýshynyń vıtse-prezıdent — kómekshi ınstıtýt degen pikirin jarııalaǵanbyz.
