Qazaqstan men Úndistan taýar aınalymyn $1 mlrd-qa deıin arttyrýdy kózdeıdi — elshi
ASTANA. KAZINFORM — Úndistan men Qazaqstan saýda-ekonomıkalyq yntymaqtastyqty keńeıtý úshin aıtarlyqtaı áleýetke ıe. Bul týraly Úndistannyń Qazaqstandaǵy Tótenshe jáne ókiletti elshisi Saılas Tangal málimdedi.
Dıplomattyń aıtýynsha, búginde eki el arasyndaǵy saıası qarym-qatynas oń sıpatta damyp keledi. Alaıda saýda-ekonomıkalyq baılanystar memleketterdiń áleýetin tolyq asha almaı otyr.
— Saýda jáne kommertsııa — Úndistan men Qazaqstan arasyndaǵy álsiz tustardyń biri. Saıası qarym-qatynasymyz óte jaqsy bolǵanymen, kólik qatynasy, fızıkalyq ınfraqurylym jáne keden máseleleri sııaqty túıtkilderdi ázirge tolyq sheshe alǵan joqpyz, — dedi Saılas Tangal Astanada ótken «Úndistan — Qazaqstan: strategııalyq dıalog» semınary aıasynda jýrnalısterge bergen suhbatynda.
Ol jańa múmkindikterdi izdeý jáne bar máselelerdiń sheshimin tabý maqsatynda qos taraptyń sarapshylary, ǵalymdary, dıplomattary men bıznes ókilderiniń qatysýymen strategııalyq dıalog uıymdastyrylǵanyn atap ótti.
Elshiniń pikirinshe, sońǵy ýaqytta eki eldiń bıznes-qoǵamdastyqtary arasyndaǵy baılanys jandana túsken. Qazaqstanǵa 46 úndi farmatsevtıkalyq kompanııasynyń ókilderinen quralǵan delegatsııa kelip, bıznes-forým jáne otandyq salanyń shamamen 200 ókilimen B2B kezdesýler ótkizdi. Sonymen qatar Qazaqstanǵa Úndistan ónerkásibi konfederatsııasy (CII) bastaǵan kópsalaly úndi bıznes-delegatsııasy keldi.
Taǵy bir mańyzdy qadam — qazaqstandyq bıznestiń Úndistandaǵy bıznes-forýmǵa qatysýy boldy. Saılas Tangaldyń aıtýynsha, 6 qyrkúıekte Kazakh Invest-tiń qoldaýymen Úndistanǵa 70 kompanııanyń atynan shamamen 112 qazaqstandyq kásipker barǵan.
— Biz saýda yntymaqtastyǵyn keńeıtý baǵytynda belsendi jumys istep jatyrmyz. Aldaǵy ýaqytta $1 mlrd mejesinen asyp, bolashaqta tipti $3 mlrd-qa deıin jetemiz dep úmittenemin. Bizde muny júzege asyrýǵa áleýet te, múmkindik te bar. Óıtkeni Úndistan men Qazaqstan ekonomıkalary bir-birin kóptegen baǵytta tolyqtyrady, — dedi dıplomat.
Ol mysal retinde Qazaqstannyń munaı, ýran jáne basqa da mıneraldardy qosa alǵanda, Úndistan ekonomıkasy úshin suranysqa ıe energetıkalyq jáne shıkizat resýrstaryna ıe ekenin atap ótti. Úndistan farmatsevtıkalyq ónimderdi iri kólemde eksporttaıdy, Qazaqstan bolsa dári-dármektiń edáýir bóligin ımporttaıdy.
Qazaqstandaǵy úndi kompanııalary negizinen farmatsevtıka, mashına jasaý, azyq-túlik óndirisi, elektronıka jáne basqa da salalarda jumys isteıdi.
Eske salaıyq, jaqynda Nıý-Delıde ótken BRIKS+ sammıti Qazaqstan men Úndistan arasyndaǵy ekijaqty yntymaqtastyqqa jańa serpin berdi.
