Halyq Keńesiniń árbir múshesine erekshe jaýapkershilik júkteledi – Prezıdent
ASTANA. KAZINFORM – Halyq Keńesiniń árbir múshesine erekshe jaýapkershilik júktelip otyr. Bul týraly Memleket basshysy Qasym-Jomart Toqaev Halyq Keńesiniń uıymdastyrýshylyq otyrysynda aıtty.
Qasym-Jomart Toqaev jańa konsýltatıvtik organ quramyna kásibı biligi joǵary mamandar, abyroı-bedeli zor, naǵyz otanshyl azamattar múshe bolǵanyn atap ótti.
– Olardyń qatarynda jurtshylyqqa belgili tájirıbeli tulǵalar, memleket jáne qoǵam qaıratkerleri, kásipkerler men kóptegen belsendi azamattar bar. Quryltaıdyń alǵashqy otyrysynda aıtyp ótkenimdeı, aýqymdy reformalardyń arqasynda memlekettik basqarý isine jańa, jasampaz, ozyq oıly azamattardyń kelýine jol ashyldy. El múddesi úshin adal qyzmet etý – zor mártebe ári qasterli paryz. Osy oraıda, Sizderge – Halyq Keńesiniń árbir múshesine erekshe jaýapkershilik júktelip otyr. Sizder el ıgiligi úshin tabandy eńbek etip, memlekettigimizdi nyǵaıtýǵa zor úles qosasyzdar dep senemin. Yrysty yntymaǵymyzdy, qoǵamdyq kelisimdi kúsheıtý úshin belsendi túrde eńbek etesizder dep oılaımyn, – dedi Memleket basshysy.
Prezıdent Qazaqstan Halyq Keńesiniń aldynda turǵan mindetterge erteń alǵashqy sessııanyń negizgi otyrysynda keńirek toqtalady.
Daýys berý qorytyndysy boıynsha Erlan Qoshanov Qazaqstan Halyq Keńesiniń tóraǵasy bolyp saılandy.
