Halyq Keńesiniń aldynda tarıhı mindet tur – Erlan Qoshanov
ASTANA. KAZINFORM – El shejiresindegi alǵashqy Halyq keńesiniń jaýapkershiligi erekshe, júkteletin mindet te bólek. Bul pikirdi Qazaqstan Halyq Keńesiniń tóraǵasy Erlan Qoshanov aıtty.
– Búgin árqaısymyzǵa úlken mártebe ári zor jaýapkershilik júktelip otyr. Biz san qyrly qazaqstandyq qoǵamnyń múddesin bildiretin jańa saıası ınstıtýttyń bir bóligine aınaldyq. Sondyqtan aldymyzda tarıhı mańyzy zor mindet tur – osy ınstıtýttyń mazmunyn naqty istermen tolyqtyrýymyz kerek, – dedi Erlan Qoshanov.
Onyń aıtýynsha, Halyq Keńesine konstıtýtsııalyq mártebe berilýi Memleket basshysynyń negizgi ustanymyn taǵy bir márte aıǵaqtaıdy: halyq – memlekettiń basty strategııalyq seriktesi. Osy ustanym Memleket basshysy júzege asyryp kele jatqan aýqymdy reformalardyń barlyǵynda kórinis taýyp keledi.
– Árıne, halqymyz qoldaǵan jańa Ata zańymyzda aıqyndalǵan qundylyqtar men basymdyqtar jumysymyzdyń negizgi ózegine aınalady. Munyń bári Halyq keńesiniń qyzmetine baǵyt-baǵdar beredi. Birlesken kúsh-jigerimizdiń arqasynda Halyq keńesi ózine júktelgen mindetterdi bilikti ári abyroımen atqarady dep senemin. Bul – el shejiresindegi alǵashqy Halyq keńesi. Onyń jaýapkershiligi erekshe, júkteletin mindet te bólek. Ózderińizben birge halqymyzdyń jáne Prezıdentimizdiń senimin aqtaımyz dep senemin, – dedi Halyq Keńesiniń tóraǵasy.
Buǵan deıin Prezıdent Qasym-Jomart Toqaev Qazaqstan Halyq Keńesi tóraǵasy qyzmetine E. Qoshanovtyń kandıdatýrasyn usynǵan edi.
Eske sala ketsek, jyl basynda Prezıdent Qasym-Jomart Toqaev Qyzylordadaǵy V Ulttyq quryltaıda Halyq keńesi ınstıtýtynyń zańdyq mártebesi qandaı bolatynyn aıtyp berdi.
Keshe Prezıdent Qasym-Jomart Toqaev Qazaqstan Halyq Keńesiniń 126 adamnan turatyn quramyn bekitti. Onda etnomádenı birlestikterden — 42, qoǵamdyq birlestikterden — 42, máslıhattar men óńirlik qoǵamdyq keńesterden — 42 ókil bar.
Qazaqstan Halyq Keńesiniń birinshi sessııasy 23-24 qyrkúıek kúnderi ótedi.
