Halyq Keńesine arnalǵan 1,7 mlrd teńge qaı maqsatta ıgeriledi
ASTANA. KAZINFORM — Qarjy vıtse-mınıstri Abzal Beısenbekuly Halyq Keńesine arnalǵan qarajat qaı maqsatta ıgeriletinin túsindirdi.
- Halyq Keńesi jańadan qurylyp jatyr. Bul rette, Halyq Keńesi bizge jańadan bıýdjettik baǵdarlama ákimshisi retinde keldi, sáıkesinshe biz bıýdjet ótinimderin qaradyq. Qarastyrylǵan 1,7 mlrd teńgeni Halyq Keńesinde jumys isteıtin adamdardyń sanyna bólgen durys emes, óıtkeni bul jerde qarajat tek qana jalaqyǵa qarastyrylmaǵan. Keńes músheleri halyqpen kóp kezdesedi. Bul rette tıisti kezdesýler men forýmdardy, sessııasyn ótkizedi, sondaı-aq issapar shyǵystary bar. Munymen qosa olarda qoǵamdyq tyńdaý ótkizý eskerilgen, - dedi A. Beısenbekuly Quryltaıda tilshiler suraǵyna jaýap bere otyryp.
Onyń aıtýynsha, Halyq Keńesi jumysyndaǵy aqparattyq júıelerdi súıemeldeý úshin de tıisti shyǵystar qarastyrylǵan.
- Sondyqtan bul jerde tek qana jalaqydan bólek basqa da shyǵystar qamtylǵan. Atap aıtqanda, Halyq Keńesiniń hatshylyǵy múshelerine biryńǵaı eńbekaqy tóleý júıesi bar, - dedi vıtse-mınıstr.
Aıta keteıik, Halyq Keńesin qurýǵa bıýdjetten 1,7 mlrd teńge bólinedi.
Buǵan deıin depýtat Erlan Saıyr Qazaqstan Halyq Keńesiniń músheleri qoǵamdyq negizde jumys isteıtinin aıtqan edi.
Sonymen qatar ol keńestiń qyzmetin uıymdastyrý baǵytynda jumys isteıtin tıisti Hatshylyq qurylatynyn jáne ol memlekettik organ retinde qyzmet etetinin eske saldy. Bul turǵyda hatshylyq qyzmetkerleriniń jalaqysy bıýdjetten qarjylandyrylady.
