Halyq Keńesi konstıtýtsııalyq mártebesi bar biregeı ınstıtýt bolatynyna kúmánim joq — Prezıdent
ASTANA. KAZINFORM — Álemde jańa Konstıtýtsııanyń qabyldanýy búkil dúnıe júzi tarıhynda óte sırek kezdesetin jaǵdaı dep aıtýǵa bolady Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Elimizdiń eń joǵary konsýltatıvtik mekemesi — Qazaqstan Halyq Keńesiniń alǵashqy sessııasynyń ashylýy barshańyzǵa qutty bolsyn! Búgin elimiz úshin asa mańyzdy kún, shyn máninde tarıhı oqıǵa dep aıtýǵa tolyq negiz bar. Qazaqstan Halyq Keńesi memleketimizdiń saıası júıesinde aıryqsha oryn alatyn, konstıtýtsııalyq mártebesi bar biregeı ınstıtýt bolatynyna kúmánim joq. Qazir Qazaqstan aýqymdy ózgerister kezeńin bastan ótkerýde. Qoǵamymyzdyń barlyq salasynda túbegeıli reformalar iske asyrylýda. Alaıda reformalar men ózgerister osymen óz máresine jetti dep múldem aıtýǵa bolmaıdy. Bul jumys mindetti túrde jalǵasady. Biz bılik júıesin zaman talabyna saı jańǵyrtý isin qolǵa aldyq. Elimizde Halyq Keńesiniń qurylýy sonyń bir aıqyn dáleli ekeni anyq, — dedi Prezıdent.
Qasym-Jomart Toqaev memleket ómirindegi bul mańyzdy úderis osydan týra bir jyl buryn bastalǵanyn aıtty.
— Men byltyrǵy halyqqa Joldaýymda bir palataly Parlament qurý týraly bastama kóterdim. Atalǵan usynys qoǵamymyzda qyzý ári keń aýqymda talqylandy. El ishinde ashyq, shynaıy pikirtalas boldy. Azamattarymyzdyń tarapynan myńdaǵan usynystar, oı-pikirler aıtyldy. Osylaısha, talqylaýdyń sońy keıingi 30 jylda bolmaǵan mazmuny tereń konstıtýtsııalyq reformaǵa ulasty. Bıyl 15 naýryzda jalpyulttyq referendým arqyly tutas elimizdi órleý dáýirine bastaıtyn qasterli qujatty — Konstıtýtsııamyzdy qabyldadyq. Bul mańyzdy tarıhı oqıǵa halyqaralyq qaýymdastyq tarapynan zor yqylas pen qyzyǵýshylyq týǵyzdy. Óıtkeni qazirgideı bulyńǵyr, turaqsyz álemde jańa Konstıtýtsııanyń qabyldanýy búkil dúnıe júzi tarıhynda óte sırek kezdesetin jaǵdaı dep aıtýǵa bolady. Bedeldi saıasatkerler men sarapshylar Qazaqstannyń bul qadamyn shyn máninde biregeı saıası oqıǵa dep baǵalap, muny batyldyq pen jasampazdyqtyń jarqyn kórinisi retinde moıyndaý qajet ekenin biraýyzdan aıtýda, — dedi Prezıdent.
Aıta keteıik, keshe Halyq Keńesiniń uıymdastyrýshylyq otyrysy ótti. Jıynda Memleket basshysy Qasym-Jomart Toqaev Qazaqstan Halyq Keńesi tóraǵasy qyzmetine Erlan Qoshanovtyń kandıdatýrasyn usyndy.
Usynys Keńes músheleri tarapynan qoldaý tapty.
