Halyq keńesi týraly zań qabyldandy
ASTANA. KAZINFORM — Búgin Parlament palatalarynyń birlesken otyrysynda «Qazaqstan Halyq Keńesi týraly» Qazaqstan Respýblıkasynyń Konstıtýtsııalyq zańy ekinshi oqylymda qabyldandy.
Senator Nurtóre Júsip atalǵan zań jóninde baıandama jasap, ózektiligine toqtaldy.
— Bul qujat jaı ǵana zań emes, bul — memleket pen qoǵam arasyndaǵy ózara is-qımyldyń jańa modelin qalyptastyratyn, halyq ókildigin ınstıtýtsıonaldy túrde kúsheıtetin mańyzdy qadam. Zańǵa sáıkes, elimizde konstıtýtsııalyq mártebege ıe joǵary konsýltatıvtik organ Halyq keńesi qurylady. Onyń basty maqsaty — qoǵam pikirin memlekettik sheshim qabyldaý úderisiniń ajyramas bóligine aınaldyrý. Halyq keńesi tek dıalog alańy emes, ol halyqtyń shynaıy únin jetkizetin, strategııalyq deńgeıde yqpal etetin biregeı ınstıtýt bolady. Onda azamattardyń usynystary júıeli túrde qaralyp, naqty saıasatqa áser etý múmkindigine ıe bolady. Bul, ásirese, Qazaqstan sekildi kópetnosty jáne kópqyrly qoǵam úshin mańyzdy. Sebebi, turaqtylyq pen damýdyń negizi — ádil ókildik pen ashyq dıalog, — dedi ol.
Demek, Halyq keńesiniń arqasynda azamattardyń saıası úderisterdegi belsendiligi kúsheıip, eldiń keleshegine qatysty sheshimder qabyldaýǵa atsalysady.
— Keńes ártúrli áleýmettik toptardyń, óńirlerdiń jáne býyndardyń múddelerin toǵystyryp, ortaq ulttyq kún tártibin qalyptastyrýǵa yqpal etedi. Atalǵan zań demokratııalyq qaǵıdattardy odan ári nyǵaıtady. Ashyqtyq, jarııalylyq jáne eseptilik jańa deńgeıge kóteriledi. Memleket qoǵam suranysyna jedel ári júıeli jaýap beretin qurylym retinde damıdy. Eń bastysy, azamattardyń memlekettik basqarýdaǵy róli artady. Eger buryn keı bastamalar tıisti deńgeıde eskerilmeı qalsa, endi Halyq keńesi arqyly olar ınstıtýtsıonaldy túrde qaralatyn bolady. Bul — Prezıdent usynǵan «Halyq únine qulaq asatyn memleket» tujyrymdamasynyń naqty kórinisi. Sonymen qatar, zań óńirlerdiń rólin kúsheıtýge de múmkindik beredi. Jergilikti bastamalardy qoldaý arqyly áleýmettik, mádenı, bilim berý jáne ekonomıkalyq jobalardy qoldaýǵa jol ashylady. Bul zań — memleket pen qoǵam arasyndaǵy senimdi nyǵaıtatyn tarıhı qujat. Bul ár azamattyń óz pikiriniń mańyzdy ekenin sezinýine, el bolashaǵyna yqpal etýge múmkindik beredi. Biz búgin jańa qoǵamdyq kelisimniń negizin qalap otyrmyz. Bul kelisimde memleket pen halyq ózara senimdi seriktes retinde áreket etedi, — dedi senator.
Aıta keteıik, buǵan deıin Qazaqstan Halyq keńesiniń músheleri qoǵamdyq negizde jumys isteıtinin, olarǵa jalaqy tólenbeıtinin jazǵanbyz.
