Halyq keńesi shynaıy yqpal etýshi qoǵamdyq-saıası ınstıtýt bolady – Janarbek Áshimjan

ASTANA. KAZINFORM – Quryltaı men Halyq keńesin konstıtýtsııalyq deńgeıde bekitý – jaýapty, ashyq ári ınklıýzıvti memleketti qalyptastyrý jolyndaǵy strategııalyq sheshim. Bul pikirdi Májilis depýtaty, Konstıtýtsııalyq reformalar jónindegi komıssııanyń múshesi Janarbek Áshimjan aıtty. 

Depýtat bılik pen qoǵam arasyndaǵy ózara senimge negizdelgen jańa qoǵamdyq kelisimdi qalyptastyrý, memlekettik basqarýdyń mazmuny men arhıtektýrasyn túbegeıli jańartý máselesi turǵanyn atap ótti.

– Biz Senatta buryn qoldanylǵan prezıdenttik kvotalar men taǵaıyndaýlardan bas tartý arqyly ókildi bıliktiń derbestigin kúsheıtýge, saıası júıeni shynaıy demokratııalandyrýǵa baǵyt aldyq. ​Bul qadam bılik tarmaqtary arasyndaǵy tepe-teńdikti nyǵaıtyp, ınstıtýtsıonaldyq damýdyń jańa kezeńin qalyptastyrady. ​Osy logıkanyń zańdy jalǵasy retinde Quryltaıdyń ókilettikterin keńeıtý máselesi kún tártibine shyqty. ​Quryltaıǵa Konstıtýtsııalyq sotty, Joǵary aýdıtorlyq palatany, Ortalyq saılaý komıssııasyn qalyptastyrýǵa qatysý quqyǵyn berý – atalǵan ınstıtýttardyń táýelsizdigin arttyryp qana qoımaı, olardyń halyq aldyndaǵy jaýapkershiligin kúsheıtedi, - dedi J. Áshimjan agenttikke bergen suhbatynda.

Prezıdent Qasym-Jomart Toqaev Qyzylordada ótken V Ulttyq quryltaıda Halyq keńesin qurý týraly bastama kóterip, onyń memlekettiń joǵary konsýltatıvtik organy mártebesine ıe bolatynyn aıtqan edi. ​

Halyq keńesi – qoǵam men memleket arasyndaǵy turaqty ári ınstıtýtsıonaldyq dıalogty qamtamasyz etetin joǵary konsýltatıvtik organ. ​Onyń basty qundylyǵy – azamattardyń, túrli áleýmettik toptar men etnostardyń pikirleri men ustanymdaryn júıeli túrde eskerýge múmkindik berýinde.

– Halyq keńesi memlekettiń ishki saıasatynyń negizgi baǵyttary boıynsha usynymdar ázirleıdi, qoǵamdyq kelisimdi, jalpyulttyq birlik pen yntymaqty nyǵaıtýǵa baǵyttalǵan bastamalar kóteredi. Elimizdiń irgeli qaǵıdattary men jalpyulttyq qundylyqtaryn ilgeriletedi. Quryltaıǵa zań jobalaryn engizip, respýblıkalyq referendým týraly bastama kóteredi. ​Bul ókilettikter Halyq keńesin formaldy organ emes, shynaıy yqpal etýshi qoǵamdyq-saıası ınstıtýt deńgeıine kóteredi, - dedi Májilis depýtaty. 
​
Sonymen birge, Komıssııa múshesi ​Halyq eeńesiniń quramyn rotatsııa qaǵıdaty arqyly qalyptastyrý demokratııalyq prıntsıpterdiń barynsha keń kólemde júzege asyratynyn aıtyp otyr. ​Bul bıliktiń tuıyqtalýyna jol bermeı, jańa ıdeıalar men bastamalardyń turaqty túrde iske asýyna múmkindik beredi.

– Biz bul protsesti Konstıtýtsııaǵa jekelegen túzetýler engizý retinde emes, jańa Konstıtýtsııany qalyptastyrý retinde qarastyrýymyz qajet. ​Osy arqyly mazmuny men rýhy jaǵynan jańarǵan, halyqtyń erki men zamanaýı talaptarǵa negizdelgen jańa qoǵamdyq kelisim qalyptasady.​Qoryta aıtqanda, Quryltaı men Halyq keńesin konstıtýtsııalyq deńgeıde bekitý – jaýapty, ashyq ári ınklıýzıvti memleketti qalyptastyrý jolyndaǵy strategııalyq sheshim. ​Muny Qazaqstannyń demokratııalyq damýynyń jańa kezeńi dep baǵalaýǵa bolady, - dedi Janarbek Áshimjan.

Aıta keteıik, osy aptada Prezıdentke Konstıtýtsııanyń qorytyndy mátini usynylýy múmkin.