Halyq keńesi óńirlerdegi máselelerdi sheshýge usynystar ázirleıdi
ASTANA. KAZINFORM — Búgin Erlan Qoshanovtyń tóraǵalyǵymen Qazaqstan Halyq Keńesi Tóralqasynyń keńeıtilgen otyrysy ótti.
Jıynnyń negizgi taqyryby – Memleket basshysynyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda aıtylǵan mindetterdi iske asyrý.
Otyrysty ashqan Erlan Qoshanov Prezıdenttiń halyqqa Joldaýy tereń mazmundy, tujyrymdamalyq máni bar qujat ekenin atap ótti. Onda Qazaqstannyń bolashaǵy, jańa álemdik tártiptegi orny jáne aldaǵy jyldardaǵy damý baǵyty aıqyndalǵan.
Tóraǵanyń pikirinshe, bıylǵy Joldaý el damýynyń aýqymdy paıymy men strategııalyq tásilimen erekshelenedi. Memleket basshysy Qazaqstannyń aldynda turǵan mindetterdi jahandyq ózgeristerdi, jańa tehnologııalyq bolmysty jáne eldiń odan ári damýyn aıqyndaıtyn zamanaýı syn-qaterlerdi eskere otyryp qarastyrady.
Ol sondaı-aq Memleket basshysynyń bastamalaryn iske asyrý Qazaqstan Halyq Keńesi músheleriniń belsendi qatysýyn jáne naqty nátıjeler úshin jeke jaýapkershilikti talap etetinin atap ótti. Sondyqtan basym baǵyttardy aıqyndap, jalpyulttyq maqsattarǵa qol jetkizýge qosatyn óz úlesin naqty túsiný asa mańyzdy.
El damýynyń uzaq merzimdi baǵdarlaryn qalyptastyrý maqsatymen Qazaqstandyq qoǵamdyq damý ınstıtýtymen birlesip, jyl saıynǵy baıandama daıyndaý josparlanyp otyr. Bul baıandama óńirlerden kelip túsken bastamalardy jınaqtaýǵa, azamattardy tolǵandyratyn ózekti máselelerdi aıqyndaýǵa jáne elimizdiń strategııalyq qujattaryn ázirleýge arnalǵan usynystar qalyptastyrýǵa múmkindik beredi.
Bul jumysqa otandyq jetekshi sarapshylar men ǵylymı qoǵamdastyq ókilderi, sonyń ishinde Erkin Ábil, Aıgúl Sádýaqasova, Botagóz Rakısheva jáne Naılıa Muhtarova tartylady.
Qatysýshylar jańa Azamattyq kodeksti ázirleý máselesine de erekshe nazar aýdardy. Erlan Qoshanov qujatty daıyndaý jumysyna azamattyq qoǵamnyń keńinen qatysýy qajet ekenin atap ótti. Onyń aıtýynsha, jańa Kodeks zamanaýı talaptarǵa saı bolyp, halyqtyń ártúrli sanattarynyń múddelerin eskerýi tıis.
Bul jumysqa belgili zańger ǵalymdar Isıdor Borchashvılı, Mádı Myrzaǵaraev jáne Andreı Lýkındi de tartý usynyldy.
Halyqtyń tsıfrlyq daǵdylaryn damytý máselesine de erekshe nazar aýdaryldy. Azamattardyń praktıkalyq tsıfrlyq daǵdylaryn qalyptastyrýǵa baǵyttalǵan aýqymdy bilim berý jobasyn iske qosý usynyldy. Aýyl turǵyndaryna marketpleıster men ınternet-platformalar arqyly taýar satýdy úıretý, al jastarǵa jeke kásip ashý úshin tsıfrlyq quraldardy paıdalanýdy meńgertý josparlanyp otyr.
Óńirlerdegi jumysqa da basymdyq berildi. Jyl boıy Qazaqstan Halyq Keńesi ákimdiktermen, qoǵamdyq keńestermen jáne úkimettik emes uıymdarmen kezdesýler ótkizýdi josparlap otyr. Kezdesýlerdiń negizgi maqsaty – halyqty tolǵandyratyn ózekti máselelerdi anyqtaý, olardy sheshý joldaryn izdestirý jáne Halyq Keńesiniń kelesi sessııasyna naqty zańnamalyq ári praktıkalyq usynystar ázirleý.
Qazaqstan Halyq Keńesi músheleriniń jumys tıimdiligin arttyrý jáne bastamalardyń iske asyrylýyn baqylaý maqsatynda Hatshylyq biryńǵaı tsıfrlyq platforma ázirlep jatyr. Bul júıe qajetti aqparatty, qujattardy qaraý barysyn jáne olardyń aǵymdaǵy mártebesin jedel baqylaýǵa múmkindik beredi. Paıdalanýshylarǵa qolaıly bolý úshin usynystar berýdiń biryńǵaı nysany engiziledi. Platformany ázirleý jumysyna Baǵdat Mýsın, Ádilhan Qopabaev jáne Jandos Aqtaev tartyldy.
Otyrys barysynda Qazaqstan Halyq Keńesiniń músheleri, qoǵamdyq keńester men qoǵamdyq uıymdardyń ókilderi de sóz sóılep, salalyq jobalardy iske asyrý boıynsha óz usynystaryn ortaǵa saldy.
Qazaqstan Halyq Keńesiniń músheleri Nurtaı Sabılıanov pen Vera Kım óńirlerde «Halyqtyq qurylys» baǵdarlamasyn iske asyrýǵa qatysty usynystaryn aıtty. Olar jol qurylysy, tsıfrlandyrý máselelerine jáne qala men aýyl arasyndaǵy alshaqtyqty qysqartýǵa baǵyttalǵan sharalarǵa erekshe nazar aýdardy.
Infraqurylym taqyrybyn jalǵastyra otyryp, Qostanaı avtomobıl kóligi kolledjiniń dırektory Dmıtrıı Pavlenko «Halyqtyq qurylys» baǵdarlamasynyń jumyspen qamtý salasyna da oń áserin tıgizip otyrǵanyn atap ótti. Baǵdarlamany iske asyrý tehnıkalyq jáne kásiptik bilimge degen suranysty edáýir arttyryp, bilikti mamandardyń uzaq merzimdi jumyspen qamtylýyna múmkindik beredi.
Jumystyń taǵy bir mańyzdy baǵyty retinde Tóralqa músheleri Bekmurat Júsipov pen Erkin Ábildiń usynystary aıtyldy. Olar jobalardyń iske asyrylý barysyna turaqty qoǵamdyq baqylaý júrgizý qajettigine toqtaldy. Olardyń pikirinshe, bul jumysqa beıindi sarapshylardy tartý ashyqtyqty qamtamasyz etip, josparlanǵan jumystardyń sapaly ári ýaqtyly oryndalýyna múmkindik beredi. Atap aıtqanda, azamattar jobalardyń iske asyrylý merzimderi men barysy, oǵan qatysýshylar jáne bólinetin qarjy qarajaty týraly habardar bolady.
Otyrys barysynda ınklıýzıvti ortany damytý máseleleri de qozǵaldy. Bul saladaǵy ózekti mindetter týraly jeke tájirıbesine súıene otyryp, belgili parasportshy, Astana qalasy Qoǵamdyq keńesiniń múshesi Ardaq Otorbaev baıandady. Onyń aıtýynsha, sońǵy jyldary memleket tarapynan bul máselege aıtarlyqtaı kóńil bólinip, azamattardyń tolyqqandy ómir súrýine, sportpen aınalysýyna jáne ózin-ózi damytýyna jaǵdaı jasalýda.
Tóralqa otyrysynda aıtylǵan barlyq bastamalar memlekettik organdarmen birlesip qosymsha pysyqtalyp, aldaǵy kezeńge arnalǵan Halyq Keńesiniń keshendi jumys josparyna engiziletini atap ótildi.
