Halyq Keńesi músheleri qaza tapqan áskerılerdiń otbasylaryna 815 mln teńge bóledi

Qaıyrymdylyq bastamasyna elimizdiń ár óńirindegi bıznes ókilderi qosyldy. Qazaqstan Halyq Keńesi Hatshylyǵynyń habarlaýynsha, qarajat qaza tapqan áskerı qyzmetshilerdiń otbasylaryna tikeleı beriledi.

Allur Group dırektorlar keńesiniń tóraǵasy Andreı Lavrentev pen Integra Construction KZ bas dırektory Shahmýrat Mýtalıp qaza tapqan áskerı qyzmetshilerdiń árbir otbasyna 25 mln teńgeden joldaıdy.

– SA Construction Group bas dırektory Gadjı Gadjıev otbasylarǵa kómekke 100 mln teńge, Karazhal Operating negizin qalaýshy Jumabek Janyqulov 50 mln teńge bóledi. Baqyt Ataıbekov, Dmıtrıı Laktıýshın jáne Imamzada Shaǵyrtaev 10 mln teńgeden bóledi. Gennadıı Zenchenko, Akbarjon Ismaılov, Aleksandr Kýprıenko, Syrym Ertaev jáne Lýgmar Býlarov 5 mln teńgeden jiberedi, – dep habarlady Qazaqstan Halyq Keńesiniń Hatshylyǵy.

Sonymen qatar bastamaǵa Nıkolaı Arsıýtın, Rafaıl Gadjıbalaev, Manas Tashybekov, Latıpsha Asanov jáne Abdýlla Ismatýllaev qosyldy. Olardyń árqaısysy qaza tapqan áskerı qyzmetshilerdiń otbasylaryn qoldaýǵa 1 mln teńgeden bóledi.

Buǵan deıin Qazaqstan Halyq Keńesiniń tóraǵasy Erlan Qoshanov áskerı qyzmetshilerdiń týǵan-týystary men jaqyndaryna kóńil aıtyp, Memleket basshysynyń tapsyrmasymen arnaıy memlekettik komıssııa qurylyp, barlyq qajetti kómek uıymdastyrylǵanyn atap ótti.

– Bizdiń áskerı qyzmetshilerimizdiń qaza bolýy – eń aldymen úlken adamzat qasireti. Memleket basshysynyń ókimimen 25 qyrkúıek jalpyulttyq aza tutý kúni bolyp jarııalandy. Qaza tapqandardyń týystary men jaqyndaryna shyn júrekten kóńil aıtamyn, al zardap shekkenderge tezirek saýyǵyp, úılerine oralýyn tileımin, – dedi Erlan Qoshanov.

Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.

Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.

Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.

Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.

Budan bólek, Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy. Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.

Premer-mınıstrdiń orynbasary Qanat Bozymbaev bastaǵan komıssııa Mańǵystaý oblysyna baryp, áli tabylmaǵan áskerı qyzmetshilerdi úzdiksiz izdestirýdi tapsyrdy.

Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.

Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.