Halyq keńesi men Quryltaıdyń aıyrmashylyǵy nede – Senat depýtaty túsindirdi

ASTANA. KAZINFORM – Qazaqstanda memlekettik basqarý júıesi men zań shyǵarý bıliginde túbegeıli ózgerister oryn alýy múmkin. «Jibek Joly» telearnasynyń «Jańa Ýaqyt» saraptamalyq baǵdarlamasyna suhbat bergen Senat depýtaty Murat Qadirbek Konstıtýtsııanyń jańa jobasyndaǵy bir palataly Quryltaıdyń qurylýy, Vıtse-prezıdent laýazymynyń engizilýi jáne Halyq keńesiniń róli týraly baıandap berdi.

Jańa konstıtýtsııalyq jobanyń basty ereksheligi – zań shyǵarý fýnktsııasyn atqaratyn kásibı organ retinde bir palataly Quryltaıdy qurý. 145 depýtattan turatyn bul organ qazirgi eki palataly parlamenttińornyn basyp, zań shyǵarý protsesin jeńildetpek.

– Quryltaı – zań shyǵarý qyzmetin júzege asyratyn 145 depýtattan turatyn kásibı organ. Bul reforma zań shyǵarý protsesin jeńildetip, zaman talabyna saı qoǵamdyq qatynastardy retteýge jedel áreket etýge múmkindik beredi. Jańa ereje boıynsha zańdar úsh oqylymda qabyldanady. Alǵashqy eki oqylymda zańnyń mazmunyna basymdyq berilse, úshinshi oqylymda normatıvtik aktilerdiń ıkemdi ári túsinikti bolýy úshin zańdyq tehnıkasy pysyqtalady, – deıdi Murat Qadirbek.

Depýtattyń aıtýynsha, Quryltaıdyń quzyretine tek zań shyǵarý ǵana emes, Prezıdent saılaýyn jarııalaý, referendým taǵaıyndaýǵa bastamashy bolý jáne Premer-mınıstr men Konstıtýtsııalyq sot múshelerin taǵaıyndaýǵa kelisim berý sekildi strategııalyq máseleler kiredi. 

Murat Qadirbektiń taǵy bir mańyzdy jańalyq – Vıtse-prezıdent ınstıtýtyna da toqtalyp ótti.

– Jobada Vıtse-prezıdent degen jańa uǵym bar. Ol Úkimet pen Quryltaı arasyndaǵy qarym-qatynasta Prezıdenttiń atynan ókildik etetin, sondaı-aq halyqaralyq arenada Memleket basshysynyń tapsyrmasymen Qazaqstannyń atyn tanytatyn laýazymdy tulǵa bolmaq. Onyń kandıdatýrasyn bekitý de Quryltaı depýtattarynyń kópshilik daýysymen júzege asyrylady, – dep atap ótti senator.

Sonymen qatar, qoǵamda Quryltaı men Halyq keńesiniń fýnktsııalaryna qatysty týyndaǵan saýaldarǵa da jaýap berildi. Depýtattyń túsindirýinshe, bul eki organ birin-biri qaıtalamaıdy. Quryltaı zań shyǵarýmen aınalyssa, Halyq keńesi el birligi men ishki saıasatqa qatysty usynystar daıyndaıtyn eń joǵarǵy konsýltatıvti organ bolmaq. 

Mazmundyq turǵydan jańa Konstıtýtsııa 11 bólimnen jáne 95 baptan turady. Onda buryn-sońdy bolmaǵan «jedeldetilgen damý qalalaryna» qatysty arnaıy quqyqtyq rejımder ornatý máselesi de qarastyrylǵan. Mundaı mártebe, máselen, jańadan boı kóterip jatqan Alataý qalasyna ınvestıtsııa tartýdy jedeldetý úshin berilýi múmkin.

Aıta keteıik, osyǵan oraı Alataý qalasynda 1,8 trln teńgelik 44 ınvestıtsııalyq joba iske asyrylmaq.