Halyq Keńesi men Quryltaı bir-biriniń jumysyna aralaspaıdy — Prezıdent
ASTANA. KAZINFORM — Qazaqstan Halyq Keńesi — Quryltaıǵa balama emes. Eki ınstıtýt ta bir-birin tolyqtyryp, birlese qyzmet etýi kerek. Bul týraly Memleket basshysy Qasym-Jomart Toqaev Qazaqstan Halyq Keńesiniń birinshi sessııasynda aıtty.
— Halyq Keńesi — Quryltaıǵa balama mekeme emes. Keńes músheleri Quryltaıdyń quzyretine kiretin jumyspen aınalyspaıdy. Depýtattardyń qyzmetine aralaspaıdy. Zań boıynsha osyndaı áreketterge quqy joq. Tıisinshe, Quryltaı depýtattarynyń da Halyq Keńesiniń jumysyna aralasýǵa haqy joq, — dep atap ótti. Memleket basshysy.
Prezıdent báriniń aldynda turǵan basty maqsat: eki ınstıtýt ta bir-birin tolyqtyryp, birlese qyzmet etýi ekenin eske saldy.
Sondyqtan Halyq Keńesi men Quryltaıdyń komıtetteri tyǵyz baılanysta bolyp, úılesimdi túrde jumys isteýi qajet.
— Aldymyzda turǵan maqsat ta — bir, Otanymyz da — bir. Sondyqtan bárimiz birtutas el bolyp bir jeńnen qol, bir jaǵadan bas shyǵaryp Qazaqstan halqy úshin tabandy qyzmet etýimiz kerek. Zań jobalaryn ázirleý barysynda jurtshylyqtyń oı-pikirin, talap-tilegin tolyqqandy eskerý qajet. Quryltaı men Halyq Keńesi árqashanda birge bolsa, osyndaı múmkindik mindetti túrde paıda bolady, — dedi Qasym-Jomart Toqaev.
Qazaqstan Halyq Keńesine etnomádenı birlestikterdiń, aımaqtyq máslıhattar men qoǵamdyq keńesterdiń, sondaı-aq, qoǵamdyq uıymdardyń ókilderi kirdi. Osylaısha memleket pen qoǵam arasyndaǵy baılanystyń jańa, aýqymdy ári birtutas júıesi qalyptasyp otyr.
Buǵan deıin Prezıdent bir jylda Qazaqstanda eldiń saıası júıesi men memlekettik basqarýyna eleýli ózgeris ákelgen aýqymdy reformalar júzege asqanyn aıtqan edi.
Qasym-Jomart Toqaev Qazaqstannyń 7 jyldaǵy negizgi kórsetkishterin atady.
Sondaı-aq Prezıdent «Túrli kózqaras — birtutas ult» tujyrymdamasy týraly pikir bildirdi.
