Halyq Keńesi qandaı máselelerdi sheshedi
ASTANA. KAZINFORM – Qazaqstan Halyq Keńesiniń eń jas múshesi Jandos Aqtaevtyń aıtýynsha, eldegi ózekti máselelerdi sheshýge keshendi tásil qajet. Bul týraly ol Jibek Joly telearnasynyń «Búgin Live» baǵdarlamasynda aıtty.
— Jaqynda Keńestiń Óńirlik damý jáne jergilikti ózin-ózi basqarý komıtetiniń alǵashqy otyrysy ótti. Otyrysta Keńes músheleri birneshe baǵyt boıynsha jumys isteıtin salalyq komıssııalarǵa bólindi. Atap aıtqanda, óńirlik damý men kásipkerlikti qoldaý, ekologııa jáne áleýmettik jaýapkershilik máseleleri nazarǵa alyndy.
Komıtet otyrysynda aldaǵy jumystyń negizgi baǵyttary da aıqyndalyp, salalyq komıssııalardyń erejeleri bekitildi. Endi Keńes músheleri naqty salalar boıynsha jumys istep, qoǵamdaǵy ózekti máselelerdi kóterýge jáne olardy sheshýge baǵyttalǵan usynystar ázirlemek. Bul rette qoǵamdyq keńestermen ózara is-qımyldy kúsheıtý de mańyzdy mindetterdiń biri bolmaq, — dedi Jandos Aqtaev.
Keńestiń jumys baǵyttary keń bolǵanymen, olardyń barlyǵy azamattardyń kúndelikti ómirine áser etetin máselelermen tikeleı baılanysty. Osy rette spıker jastardyń baspanaly bolýy men tsıfrlyq alaıaqtyqqa qarsy kúresti aldaǵy jumysta nazar aýdarýdy qajet etetin máselelerdiń biri retinde atady.
— Jastardyń baspanaly bolýy úshin memleket túrli mehanızmderdi usynyp jatyr. Biraq olardyń ózi máseleni tolyq sheshpeı jatyr. Aldaǵy ýaqytta osyny nysanaǵa alý kerek. Ekinshi másele — tsıfrlyq alaıaqtyq. Ótken jyly kıberalaıaqtar qazaqstandyqtarǵa 29 mlrd 6 mln teńge shyǵyn keltirdi. Sondyqtan tsıfrlyq qaýipsizdikti kúsheıtý kerek, kıbersaýattylyqty arttyrý mańyzdy, — dedi ol.
Buǵan deıin Qazaqstan Halyq Keńesiniń quramy men turaqty komıtetteriniń tóraǵalary bekitilgen bolatyn.
