Halyq keńesi Assambleıa jumysyn odan ári kúsheıtedi – Prezıdent
ASTANA. KAZINFORM – Memleket basshysy Qasym-Jomart Toqaev Táýelsizdik saraıynda ótken brıfıngte Halyq keńesiniń jumysyn arttyrý týraly pikir bildirdi.
– Siz konstıtýtsııalyq reforma tarıhı ózgeristerdiń bastamasy ekenin, al túbegeıli jańǵyrtý jyl sońyna deıin, tipti kelesi jyly da jalǵasatynyn aıtqan edińiz. Endi Quryltaı men Qazaqstan Halyq keńesi iske kirisip, Vıtse-prezıdent laýazymy taǵaıyndalǵan soń, elde qandaı ózgerister bolady?, – dep suraq qoıdy jýrnalıst.
Óz jaýabynda Prezıdent jańa Vıtse-prezıdent aldaǵy on kúnde taǵaıyndalatynyn jetkizip, Halyq keńesiniń jumysy týraly da basa aıtty.
– Taǵy basqa reformalardy iske asyramyz. Mysaly, Halyq Keńesiniń jumysyn jandandyrý qajet. Halyq Keńesi degenimiz – jańa organ. Keıbir azamattar Assambleıa týraly surap jatyr eken. Halyq Keńesi Assambleıanyń atqarǵan qyzmetin odan ári kúsheıtedi dep oılaımyn. Bul kópfýnktsıonaldy, jańa saıası tetik dep aıtýǵa bolady. Sondyqtan Keńestiń jumysy jemisti bolatynyna kámil senemin, – dedi Qasym-Jomart Toqaev.
Aıta keteıik, búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Memleket basshysy Qasym-Jomart Toqaev Táýelsizdik saraıynda ornalasqan №520 saılaý ýchaskesinde daýys berdi.
