«Halyq qatysatyn bıýdjet» jobasy Kókshetaýda qalaı júzege asyrylyp jatyr
KÓKShETAÝ. KAZINFORM – Kókshetaý qalasynda «Halyq qatysatyn bıýdjet» jobasyna qatysý úshin bıyl 50 joba usynylǵan. Onyń 10-y belgilengen erejelerge sáıkes kelmese, 40 joba daýys berý kezeńine sátti ótken.
Qala ákimdiginiń baspasóz hatshysy Mahabbat Samrattyń aıtýynsha, joba oblys ortalyǵyn damytýda turǵyndardyń tikeleı qatysýyna jańa múmkindikter ashyp otyr.
«Atalmysh joba bıylǵy jyly qańtardyń úshinshi onkúndiginde bastaldy. Negizgi maqsat-bıýdjet protsesiniń ashyqtyǵyn qamtamasyz etý jáne qala turǵyndaryna jergilikti bıýdjet qarajatyn bólýge qatysýǵa múmkindik berý. Jobaǵa qatysýǵa ótinimderdi óz aýlalary men qoǵamdyq keńistikterin abattandyrýǵa múddeli Kókshetaýdyń barlyq turǵyndary bere alady. Joba sheńberinde aýmaqty kógaldandyrý, trotýarlardy jaılastyrý, sporttyq, balalar oıyn alańdaryn salý jáne jóndeý sııaqty túrli maqsattardy tańdaýǵa bolady», – deıdi Mahabbat Samrat.
Ol atap ótkendeı, jobanyń bastalǵany týraly habarlandyrýdan keıin turǵyndar óz jobalaryn daıyndap, ony qala ákimdiginiń saıtyna júkteýi kerek. Saraptamalyq keńes kelip túsken jobalardy erejelerge sáıkestigin qaraıdy, sodan keıin daýys berý kezeńi bastalady.
«Joba maquldanýy úshin kem degende 50 daýys jınaýy kerek. Bıyl 50 joba usynyldy, onyń 10-y belgilengen erejelerge sáıkes kelmedi. Qalǵan 40 joba daýys berý kezeńine sátti ótti. Aıta ketetin jaıt, ákimdik bul kezeńge qatyspaıdy. Іstiń nátıjesi tek qatysýshylardyń, ıaǵnı turǵyndardyń ózderine degen umtylysyna baılanysty. Usynylǵan 40 jobanyń 19-y 50-den astam daýys jınaı aldy, endi osy bastamalar boıynsha qurylys jumystary maýsym aıynda bastaldy. Búgingi tańda 10 alań boıynsha jumystar aıaqtaldy. Olardyń barlyǵy sapa jáne qaýipsizdik standarttaryna sáıkes keletin zamanaýı jabdyqtarmen jabdyqtalǵan», – dep tolyqtyrdy Mahabbat Samrat.
Sonyń biri – Kókshetaý qalasynyń Nazarbaev kóshesi 64 mekenjaıy boıynsha ornalasqan kópqabatty turǵyn úıdiń aýlasynda jańa zamanaýı sport jáne balalar oıyn alańdary salynyp, halyq ıgiligine berildi. «Halyq qatysatyn bıýdjet» jobasy aıasynda salynǵan nysannyń qurylysy jumystaryn merdiger «STRONG SERVICE» JShS júrgizdi.
Bul sol jaqyn mańdaǵy úılerdiń turǵyndary úshin qýanyshty oqıǵa boldy. Jergilikti turǵyndar, ásirese balalary bar ata-analar sport jáne oıyn alańdarynyń ashylýyn asyǵa kútti.
«Buryn biz balalarymyzdyń oınap, jattyǵýy úshin ózge úılerdiń aýlalaryna baratyn edik. Endi bári úıimizdiń aldynda, eshqaıda barýdyń qajeti joq. Balalar jańa trenajerler men oıyn jabdyqtaryna qýanyp jatyr. Biz «Halyq qatysatyn bıýdjet» jobasyna ózimiz qatysa alatynymyzǵa qýanyshtymyz», – dedi qala turǵyny Anjelıka Tolpakova.
Anjelıka bastaǵan turǵyndar osy jobanyń iske asyrylýyna belsendi qatysqan bolatyn. Balalar oıyn alańymen qatar, aýlada kóshe trenajerlary bar zamanaýı sport alańy da jabdyqtalǵan. Bul jergilikti jastarǵa sportpen shuǵyldanýǵa jáne salaýatty ómir saltyn ustanýǵa múmkindik beredi.
«Alańnyń ashylýy Kókshetaý qalasyn abattandyrý baǵdarlamasyn iske asyrýdaǵy taǵy bir qadam boldy. Jalpy, «Halyq qatysatyn bıýdjet» jobasy turǵyndardyń pikirlerin eskerýge jáne olardyń qajettilikterine qaraı qalanyń ınfraqurylymyn damytýǵa múmkindik beredi. Bul ózara túsinistik atmosferasyn qalyptastyrady jáne azamattardyń qalanyń damýyna qatysýyn anaǵurlym aıqyn etedi. Mundaı bastamalardyń damýyn jalǵastyrý mańyzdy, óıtkeni jaıly qalalyq orta – bul baqytty balalyq shaqtyń jáne barlyq turǵyndardyń qala ómirine belsendi qatysýynyń kepili», – dep túıindedi qala ákiminiń baspasóz hatshysy Mahabbat Samrat.
Aıta ketsek, osy kúni Kókshetaýda «Halyq qatysatyn bıýdjet» jobasy aıasynda 19 jańa sport jáne balalar oıyn alańdary salynyp jatyr. Bul bizdiń turǵyndar, ásirese balalar men jastar úshin yńǵaıly jaǵdaıda sportpen shuǵyldanýǵa tamasha múmkindik.
Eske salaıyq, budan buryn Aqmola oblysynyń bir aýylynda eki birdeı jaıly mektep ashylǵanyn jazǵan edik.
