Halyq qatysatyn bıýdjet: Astanada 15 aýla men 3 qoǵamdyq keńistik abattandyryldy
ASTANA. KAZINFORM – Astana turǵyndary úshin qalada taǵy bir qoǵamdyq keńistik ashyldy, dep habarlaıdy elorda ákimdiginiń resmı saıty.
Saraıshyq aýdanynyń R.Qoshqarbaev – Təýelsizdik dańǵyldary men A. Baıtursynov kóshesi aralyǵyndaǵy aýmaqta astanalyqtar endi jańartylǵan jolmen serýendep, jańadan paıda bolǵan velosıped jolymen qatynaı alady.
Jalpy bıyl Astanada abattandyrý jumysy qarqyndy júrip jatyr. Onyń ishinde, Saraıshyq aýdanynda turǵyndarǵa qolaıly jaǵdaı jasaý maqsatynda birqatar aýla men qoǵamdyq keńistik jańartyldy.
«Aýdanymyzda bıyl «Halyq qatysatyn bıýdjet» jobasy aıasynda 15 aýlany abattandyrýmen qatar, jańadan 3 keńistik paıdalanýǵa berilip jatyr. Onyń biri keshe ǵana Júrgenov kóshesiniń boıyndaǵy «Jumysshy mamandyqtar jylyna» arnalǵan alleıa bolsa, búgin de mine, R.Qoshqarbaev – Təýelsizdik dańǵyldary men A. Baıtursynov kóshesi úshburyshyndaǵy keńistikti jańartylǵan keıipke endi. Taǵy ekeýinde jumys júrip jatyr. Bir jaǵynan, tamasha aýa-raıyn paıdalanyp, turǵyndarǵa, balalarǵa kóńildi sát syılaǵymyz keldi», – deıdi Saraıshyq aýdany ákiminiń orynbasary Shuǵyla Qudaıbergen.
Sonymen birge, tórtinshi qoǵamdyq keńistik – «Bravo Family» turǵyn úı kesheni men №93 mektep-lıtseı janynda abattandyrý jumystary bastalyp ketken.
Ásirese R. Qoshqarbaev – Táýelsizdik dańǵyldary men A. Baıtursynov kóshesi aralyǵyndaǵy oryn erekshe qulpyryp shyǵa keldi. Onyń ústine, turǵyndardyń qolaılylyǵy úshin 3 myń sharshy metr avtoturaq jasaqtalyp, oryndyqtar qoıyldy.
Kógaldandyrý jumysy aıasynda 140 túp aǵash otyrǵyzylyp, taǵy 90 aǵashtyń orny daıyndaldy. Bul aýmaq gúlmen de kómkerile túsken. Máselen, 3500 sándik gúldi buta egilgen.
Balalar men jasóspirimder úshin shaǵyn sáýlet nysandary qoıylyp, bul keńistik naǵyz demalys ornyna aınaldy.
Jalpy alǵanda, «Saraıshyq» aýdanynda ekologııalyq aılyq sheńberinde 4 myń aǵash otyrǵyzý josparlanǵan. Jyl sońyna deıin aýdan aýmaǵynda 10 myńnan astam aǵash pen 20 myń buta egilmek. Osylaısha, jańa qoǵamdyq keńistikter men jasyl jelek turǵyndardyń ómir sapasyn jaqsartýǵa, al qalanyń kórkin aıshyqtaı túsýge yqpal etpek.
Aıta keteıik, bıyl elordada 170-ke jýyq aýla men qoǵamdyq keńistikterdi – saıabaqtar, gúlzarlar men jelekjoldardy abattandyrý kózdelgen. Jumys barlyq aýdandy, onyń ishinde turǵyn alaptardy da qamtıdy. Sonymen qatar, Astanada kógaldandyrý belsendi júrgizilip jatyr: 1 mln-nan astam jasyl jelek otyrǵyzý josparlanǵan.