«Halyq qatysatyn bıýdjet»: Almatyda Abaı dańǵylynda bólý jolaǵy abattandyrylady
ALMATY.KAZINFORM — Abaı dańǵylyndaǵy bólý jolaǵy abattandyrylady. Keshendi jumys Turǵyt Ózal kóshesinen Muqanov kóshesine deıin, uzyndyǵy 2,6 shaqyrym aımaqty qamtıdy. Almaty ákimdiginen atap ótkendeı, sońǵy ret munda 15 jyl buryn jóndeý júrgizilgen. Jaryqtandyrý, sýarý júıesin ornatý, jasyl ekpelerdi sanıtarlyq jáne qalyptap kesý, sondaı-aq obektini kógaldandyrý josparda.
Atalǵan jumystar osy jyldyń kúzinde aıaqtalady. Almaty ákimi Erbolat Dosaev jańǵyrtý kezinde qala turǵyndarynyń serýendeýine qolaıly jaǵdaı jasaý úshin sapaly materıaldardy paıdalaný qajet ekenin atap ótti.
«Halyq qatysatyn bıýdjet» aıasynda Bostandyq aýdanynda bıyl barlyǵy 50 joba iske asyrylady.
Jalpy, Almatyda osy jyly «Halyq qatysatyn bıýdjet» jobasyna 18,8 mlrd teńge bólindi, bul ótken jylmen salystyrǵanda 5,8 mlrd teńgege artyq.
Almatylyqtar qala bıýdjeti esebinen aýlalardy, qoǵamdyq keńistikterdi abattandyrý, sport jáne oıyn alańdaryn qurý boıynsha óz ıdeıalaryn júzege asyra alady.
