«Halyq qaharmany» Kenjebaı Mádenovtiń ulyna Altyn juldyz ben «Otan» ordeni tabystaldy

Kenjebaı Mádenuly Mádenov 1925 jyly 19 aqpanda Batys Qazaqtan oblysy Qaratóbe aýdany Qarakól aýyldyq okrýgi Aqtaı-saı aýylynda týǵan.

1950-1974 jyldar aralyǵynda Batys Qazaqstan jáne Gýrev oblystaryndaǵy QazKSR MQK organdarynda qyzmet atqarǵan. Ulttyq qaýipsizdik komıtetiniń ardageri. 1974 jyly 26 jeltoqsanda dúnıeden ótken.

K.M. Mádenov 1944 jyly 19 jasynda 266-atqyshtar dıvızııasy 1008-polki 2-batalony 5-rotasynyń vzvod komandıri bolyp taǵaıyndalǵan.

1945 jyly 29 sáýirde K.M. Mádenov Berlın shaıqasynda qaharmandyqtyń úlgisin kórsetti. Atap aıtqanda, Berlın operatsııasy kezinde qalanyń Reıhstagtan keıingi mańyzdy ákimshilik ortalyǵy – Ratýsha ǵımaratynyń tóbesine Qyzyl Týdy ornatý K.M. Mádenov basqarǵan vzvodqa tapsyrylyp, ol buıryqty erlikpen oryndaıdy. Bul Keńes áskerine rýh berip, shabýyldyń qarqyndy jalǵasýyna yqpal etedi.

K.M. Mádenov bastaǵan jaýyngerlerdiń osy erligi Keńes Odaǵynyń marshaly G.K. Jýkovtyń «Estelikter men tolǵanystar», 5-ekpindi armııanyń Áskerı keńesiniń múshesi, general-leıtenant F.E. Bokovtyń «Jeńis kóktemi», 1948 jyly KSRO Qarýly Kúshteri mınıstrliginiń baspasy shyǵarǵan «Berlındi alý» (Shtýrm Berlına) kitaptarynda sýrettelgen.

«Qazaqstan kommýnısi» jýrnalynyń 1970 jyly 6 maýsymdaǵy nómirinde Ratýsha úshin bolǵan shaıqas jaıynda K.M. Mádenovtiń ózi de jazǵan.

Onyń esimi mektep oqýshylaryna arnalǵan 1985, 1993 jáne 2004 jyldary jaryq kórgen «Qazaqstan tarıhy» oqýlyqtaryna endi. Sondaı-aq K.M. Mádenovtiń erligin Klaýs Pohe jáne Gans Olıva atty germanııalyq jýrnalıster «Soǵys aıaqtalǵan tún» degen eńbekterine arqaý etken.

Batyrdyń qurmetine 2001 jyldyń jeltoqsanynda Atyraý oblysy boıynsha UQKD ǵımaratyna memorıaldyq taqta ornatyldy.

Al 2005 jyly Atyraý qalasynda Kenjebaı Mádenovtiń atyna kóshe berildi.

Budan buryn Prezıdent soǵys ardageri Kenjebaı Mádenovke «Halyq qaharmany» ataǵyn bergenin jazǵanbyz.