«Halyq býhgalteri» aktsııasy aıasynda 60 myń kásipker tegin kásibı kómek aldy
ASTANA. KAZINFORM — Qarjy mınıstrligi kásibı býhgalterlik uıymdarmen birlese otyryp, 2026 jyldyń 5 qańtary men 30 maýsymy aralyǵynda ótken respýblıkalyq «Halyq býhgalteri» aktsııasyn qorytyndylady, dep habarlaıdy Úkimettiń baspasóz qyzmeti.
Aktsııanyń negizgi maqsaty — kásipkerlerge praktıkalyq qoldaý kórsetý, salyqtyq jáne býhgalterlik esepti júrgizýdiń sapasyn jaqsartý jáne salyq tóleýshilerge 2026 jyly kúshine engen salyq zańnamasyndaǵy ózgeristerdi túsinýge kómektesý.
Aktsııa aıasynda oblys ortalyqtaryndaǵy, sondaı-aq Astana, Almaty, Shymkent qalalaryndaǵy Memlekettik kirister departamentiniń bólimshelerinde azamattarǵa tegin jeke keńes berý uıymdastyryldy. Keńes berý kásibı býhgalterler men memlekettik kirister organdarynyń qyzmetkerlerimen júrgizildi. Aktsııaǵa jalpy 120-dan astam akkredıtatsııadan ótken kásibı býhgalterler qatysty. Alty aıdyń ishinde bul aktsııa suranysqa ıe, kásibı býhgalterler qaýymdastyǵy jáne bıznes sektory arasyndaǵy memlekettiń ashyq dıalog alańyna aınaldy.
Aktsııa nátıjesi boıynsha:
- 60 myńnan astam salyq tóleýshiler tegin keńes aldy;
- 3247 ashyq esik kúni is-sharasy ótkizildi;
- Jergilikti deńgeıde 2928 semınar uıymdastyryldy;
- 512 suhbat pen saraptamalyq túsiniktemeler daıyndaldy;
- BAQ, teledıdar, radıo jáne áleýmettik jelilerde 10 myńnan astam maqala jarııalandy;
- Aqparattyq rolıkter radıostantsııalarda 45 000-nan astam ret shyǵaryldy;
- Zakon.kz aqparattyq qoldaýymen aktsııa materıaldary, sonyń ishinde tórt vebınar — 2,5 mln qaralym jınady.
— Tájirıbe kórsetkendeı, kásipkerler arasynda tikeleı ózara árekettesý formatyna suranys aıtarlyqtaı joǵary. Qatysýshylar jańa Salyq kodeksin qoldaný, ońtaıly salyq rejımin tańdaý, ótpeli kezeńniń erekshelikteri, salyq jeńildikteri men shegerimderi, QQS boıynsha tirkeý jáne esepten shyǵarý, arnaýly salyq rejımderin qoldaný, elektrondy shot-faktýralardy rásimdeý, aqparattyq júıelerdi paıdalaný, ózin-ózi jumyspen qamtyǵan jeke tulǵalardy esepke alý jáne olardyń qyzmetine qatysty máseleler boıynsha saraptamalyq túsiniktemeler aldy, — delingen habarlamada.
Aktsııanyń erekshe qundy aspektisi kásipkerlerdiń tájirıbeli kásibı býhgalterlerden jáne memlekettik kirister organdarynyń qyzmetkerlerinen tikeleı jeke keńes alýy boldy, bul olarǵa naqty jaǵdaılardyń sheshimin tez tabýǵa jáne salyq mindettemelerin oryndaý kezinde yqtımal qatelerdiń aldyn alýǵa múmkindik berdi.
«Halyq býhgalteri» salyq saýattylyǵyn arttyrýǵa, salyqtyq mindettemelerdi erikti oryndaý mádenıetine tárbıeleýge jáne qolaıly bıznes-ortany qurýǵa baǵyttalǵan memleket pen kásibı qoǵamdastyq arasyndaǵy yntymaqtastyqtyń tıimdi úlgisine aınaldy. Tegin kásibı kómek myńdaǵan kásipkerlerge zańnamalyq ózgeristerge senimdirek beıimdelýge jáne eń ózekti suraqtaryna der kezinde jaýap alýǵa múmkindik berdi.
Osy tájirıbe ári de óz jalǵasyn taýyp, jergilikti memlekettik kirister bazasynda aı saıyn, býhgalterlik uıymdarmen birlese otyryp salyq zańnamasyn túsindirý boıynsha «Ashyq esik kúnderi» ótkiziletin bolady.
Buǵan deıin kásibı býhgalterlik uıymdardy akkredıtatsııalaý erejesi ózgeretinin jazǵan edik.
