«Halyq býhgalteri» aktsııasy: astanalyqtardan 1,5 myńnan astam saýal tústi

ASTANA. KAZINFORM — Astanada jeke kásipkerler men shaǵyn bıznes sýbektilerine tegin konsýltatsııalyq qoldaý kórsetýge baǵyttalǵan respýblıkalyq «Halyq býhgalteri» aktsııasy jalǵasyp jatyr, dep habarlaıdy elorda ákimdiginiń resmı saıty.

Aktsııa bastalǵaly beri elorda turǵyndarynan bir jarym myńnan astam suraq kelip túsken.

— Suraqtar arnaıy salyq rejımderine kóshý, kameraldyq baqylaý, sondaı-aq kásipkerlik qyzmetke qatysty ózge de ózekti máselelerdi qamtıdy. Aktsııa 2026 jylǵy 30 maýsymǵa deıin jalǵasady, — delingen habarlamada.

Qańtar-aqpan aılarynda konsýltatsııalar aptasyna úsh ret (dúısenbi, sársenbi, juma) saǵat 10:00–den 13:00–ge deıin, al naýryz aıynan bastap aptasyna eki ret ótkiziledi.

Aktsııa tómendegi mekenjaılar boıynsha uıymdastyrylady:

• Almaty aýdany boıynsha Memlekettik kirister basqarmasy — Saraıshyq shaǵyn aýdany, Jubanov kóshesi, 16;
• Esil aýdany boıynsha Memlekettik kirister basqarmasy — Máńgilik El dańǵyly, 63;
• Nura aýdany boıynsha Memlekettik kirister basqarmasy — Qabanbaı batyr dańǵyly, 33;
• Saryarqa aýdany boıynsha Memlekettik kirister basqarmasy — M.Áýezov kóshesi, 34;
• Baıqońyr aýdany boıynsha Memlekettik kirister basqarmasy — Sh. Aımanov kóshesi, 6.

Osyǵan deıin Úkimet «Halyq býhgalteri» aktsııasynyń alǵashqy nátıjelerin jarııalady.