Halyq banktiń tonalýy: polıtseıler kúdiktilerdi izdep Grýzııa men Armenııaǵa barǵan

PAVLODAR. KAZINFORM -  Polıtsııanyń málimetinshe, tergeý jalǵasyp jatyr. Qazirgi ýaqytta bank bólimshesin tonady degen kúdikpen eki adam izdestirilip jatyr.

Pavlodar oblysynyń Polıtsııa departamenti habarlaǵandaı, kúdiktiler qylmys jasaǵannan keıin bir táýlik ishinde Qazaqstan aýmaǵynan izin sýytyp úlgergen. Olardyń beseýi eki aptadan keıin anyqtalyp, ustalǵan. Deıturǵanmen izdestirý jumystary munymen aıaqtalǵan joq.

- Atalǵan qylmys boıynsha Reseı Federatsııasymen ózara is-qımyl áli de jalǵasyp keledi. Jaqynda Pavlodar oblysy Polıtsııa departamentiniń qyzmetkerleri Grýzııa men Armenııa sııaqty elderge issaparmen bardy, bizdiń aqparatymyz boıynsha ol jaqta bul qylmysqa qatysýshylar bar. Atalǵan memleketter tarapynan jan-jaqty quqyqtyq kómek kórsetildi. Onda tergeý is-sharalarynyń qajetti kólemi júrgizildi. Bul materıaldar Reseı Federatsııasynyń prokýratýrasyna jiberiledi, - dep habarlady óńirlik Polıtsııa departamenti bastyǵynyń birinshi orynbasary Bolat Nurseıitov.

Polıtsııa qylmystyq istiń ne sebepti Reseıge berilgenin de túsindirdi. Aıtýlarynsha, barlyq kúdikti - kórshi memlekettiń azamattary. Sondyqtan olardy qazaqstandyq tarapqa bermeıdi. Olar Reseı zańdary boıynsha qylmystyq jaýapkershilikke tartylady.

Atalǵan tonaý oqıǵasy boıynsha 40-qa jýyq jábirlenýshi bar ekeni anyqtaldy. Olardyń kópshiligi Pavlodar oblysynda turady.

Eske sala keteıik, 2024 jyldyń qarasha aıynda Pavlodarda bank bólimshesiniń qabyrǵasy lommen buzyldy. 

Keıin «Halyq banktiń» Pavlodardaǵy bólimshesinen qansha dúnıe urlanǵanyn tergeý ǵana aıta alatyny málim boldy.