Halyq atom elektr stansasynyń paıdasyn bile bermeıdi — Baný Nurǵazıeva

ASTANA. KAZINFORM — Astanada ótip jatqan «Qazaqstandaǵy atom energetıkasynyń damý perspektıvalary» forýmynyń ekinshi paneldik sessııasynda spıkerler atom energetıkasy — elektr energııasynyń turaqty kózin qamtamasyz etýdiń joly ǵana emes, sonymen qatar, ekonomıkanyń sabaqtas salalaryn damytýdyń qýatty katalızatory ekenin atap ótti.

Atom elektr stansasy sııaqty aýqymdy jáne bilimdi qajet etetin jobany júzege asyrý energetıkanyń, qurylystyń, ǵylymnyń jáne taǵy basqa zamanaýı tehnologııalar sııaqty salalardyń damýyna septigi tıetini aıtyldy.

«Qazaqstanda atom elektr stansasyn salý máselesi turǵyndar arasynda biraz kúmán týdyrady. Kóbi onyń artyqshylyqtaryn bile bermeıdi. Ókinishke qaraı, halyq atom energııasyn engizýdiń naqty ekonomıkalyq paıdasy jóninde habarsyz. Elimizdiń kemel keleshegin oılasaq, energııa tapshylyǵy men energııaǵa táýeldilikten arylý mańyzdy. Qısyndy qadamdardyń biri — atom elektr stansasyn salý», — dedi talqy barysynda Qazaqstannyń azamattyq alıansynyń prezıdenti Baný Nurǵazıeva.

Spıkerler atom elektr stansalarynyń qurylysyna qarsy shyqqan jaǵdaıda energetıka salasynda úlken nátıjege jetkizý qıyn ekenin jetkizdi.

«Óz basym naqty sheshimge keldim: AES halyqqa eshqandaı qaýip tóndirmeıdi. Ol qorshaǵan ortaǵa da zııany joq. Buǵan Almaty men Kýrchatovtaǵy ǵylymı-zertteý reaktorlarynyń tájirıbesi dálel», — dep atap ótti forým moderatory, «Atameken» UKP basqarýshy dırektory, Qazaqstan Respýblıkasynyń eńbek sińirgen energetıgi Jaqyp Haırýshev.