Halyq ártisi Syr óńirindegi kórermenimen qaýyshty
Qyzylorda oblysy ákimi Nurlybek Nálibaev Syr óńirine óner saparymen kelgen Qazaqstannyń Halyq ártisi Roza Rymbaevanyń sahnadaǵy 50 jyldyǵyna arnalǵan shyǵarmashylyq keshin tamashalady, dep habarlaıdy Kazinform oblys ákimdigine silteme jasap.
Keshke QR Parlamenti Májilisindegi «AMANAT» partııasy fraktsııasynyń jetekshisi Elnur Beısenbaev, Parlament Májilisiniń depýtaty Marhabat Jaıymbetov, Májilistegi «AMANAT» partııasy fraktsııasy apparatynyń basshysy Madına Qadyrova, oblystyq máslıhat tóraǵasy Naýryzbaı Baıqadamov, ardagerler men zııaly qaýym ókilderi keldi.
Sahnadaǵy jarty ǵasyrlyq mereıli belesine oraı syrboıylyq kórermenimen qaýyshqan Roza Qýanyshqyzy uldary Álı jáne Mádımen birge repertýaryndaǵy tanymal ánderin aıtyp, kórermenniń ystyq yqylasyna bólendi. Qyzylordalyqtar ánshiniń oryndaýyndaǵy «Atameken», «Otandastar», «Ótken kún», «Nege jalǵyz?» shyǵarmalaryn tyńdap, ánshige erekshe qoshemet kórsetti. Óıtkeni Halyq ártisiniń shyǵarmashylyǵy men qazaq ániniń tutas dáýiri bir-birimen tyǵyz baılanysty.
Kontsertte Roza Rymbaeva tanymal mýzykant Batyrhan Shúkenovtiń qurmetine onyń ánderin oryndady.
Roza Rymbaeva 22 jasynda Qazaq KSR-nyń eńbek sińirgen ártisi, 29 jasynda Qazaq KSR-nyń Halyq ártisi atanǵan. Elimizdiń atyn, ultymyzdyń bolmysyn, mýzykalyq talǵamyn álemge tanytqan.
Roza Qýanyshqyzynyń 1977 jyly Bolgarııada ótken «Zolotoı orfeı» festıvaliniń bas júldesin jeńip alýy sol kezeńdegi qazaq án óneriniń ǵana emes, Keńes Odaǵy mádenıetiniń eń úlken jetistigi edi. Ánshiniń talantyn moıyndaǵan baýyrlas qyrǵyz ben ózbek aǵaıyndar Roza Qýanyshqyzyna óz respýblıkalarynyń Eńbek sińirgen ártisi ataǵyn berdi. Ol táýelsiz elimizdiń «Qurmet», «Parasat» ordenderine ıe bolyp, Qazaqstannyń Eńbek Eri atandy.
Kontsertte ánshige aımaq basshysynyń yqylas gúli usynyldy.
