Halyq 7-20-25 baǵdarlamasyna kirgizý úshin aqsha suraǵanyn aıtyp shaǵymdandy - Dáýlet Muqaev

Májilis otyrysynda halyqty turǵyn úımen qamtý máselesi taǵy qaraldy, dep habarlaıdy Kazinform agenttigi.

«Meniń qozǵaıtynym – baspana máselesi. Bilesizder, atalǵan másele qazaqstandyqtardyń bas aýrýyna aınaldy. Ásirese sońǵy jyldary másele kúrt shıeleniskendeı. Baspana jaıly Májilis minberinen birneshe ret kótergen edik. Úkimet tarapynan mardymdy jaýap bolmady. Maǵan únemi syrǵytpa jaýap keledi. Búgingi tańda baspana naryǵy turalap tur. Úı alýdyń barlyq baǵdarlamasy toqyraýǵa ushyrady. Óz depýtattyq saýalymda «Baqytty otbasy» jáne «Shańyraq» baǵdarlamalaryna ózgeris engizý, «7-20-25» baǵdarlamasy boıynsha lımıtti alyp tastaý, «Jas otbasy» baǵdarlamasy jaıly birneshe usynys aıtqan edim. Bul máseleler áli de ózektiligin joǵaltqan emes. «7-20-25» baǵdarlamasy aınalasynda jemqorlyq az emes. Baǵdarlama arqyly úı alý úshin para berýshiler de kóbeıip otyr», - dedi Dáýlet Muqaev Májilis otyrysynda Ónerkásip jáne qurylys mınıstrine saýal joldap.

Sonymen qatar halyq qalaýlysy jastardy turǵyndy úımen máselesin de kóterdi.

«Respýblıkalyq jastarǵa arnalǵan memlekettik baǵdarlamanyń qajettigi artýda. Elimizde baspana baǵytynda qandaı jumystar atqarylýda? Prezıdentimiz «Otbasy banktiń» qyzmetin qaıta qaraýdy, oblys ortalyqtaryna emes, aýdandarǵa, monoqalalarǵa jáne aýyldarǵa basymdyq berý kerek degen edi. Ózgeris qashan bolady? Qashan halyqqa tıimdi qoljetimdi baǵdarlama iske qosylady? Búgin «7-20-25»-ke lımıt ashyldy. 5 mınýtta bitti de qaldy. Oqyrmandardan «Bul ne degen sumdyq» degen hattar kelip jatyr. «Menen bank menedjeri 1 mln 400 myń surady», «Menen 700 myń teńge surady» degen hattar joldady. Bul qashan toqtaıdy?», - deıdi ol.

Ónerkásip jáne qurylys mınıstri Qanat Sharlapaev halyqty turǵyn úımen qamtýda memlekettik baǵdarlamalar iske asyp jatyr.

«Eń aldymen, mundaı úlken máseleni bir jaýappen aıta almaımyn. Biraq, sizge birneshe fakti keltireıin. Mysaly, bıyl memleket 10 myń páter berdi. Oǵan 105 mlrd teńge bólindi. Kelesi jylǵa da josparymyz bar. Ekinshi másele, Memleket basshysynyń tapsyrmasy boıynsha ótken jyly jalǵa alýdy jeńildetý úshin sýbsıdııalaý baǵdarlamasy iske asyryldy. Taǵy basqa baǵdarlama boıynsha memleket qarajat bólip jatyr. Ózińiz bilesiz, barlyq halyqty baspanamen qamtý etý ońaı emes. Eger ýaqytyńyz bolsa birge otyryp, barlyq baǵdarlamany birge qaraıyq», - deıdi vedomstvo basshysy.