Halal standarty: et óniminiń eksporty 50 paıyz ósti
ASTANA. KAZINFORM – Búgin Úkimet otyrysynda Saýda jáne ıntegratsııa mınıstri Arman Shaqqalıev eki jylda et eksporty óskenin aıtty.
- Ulttyq standarttar otandyq óndirýshilerdi qorǵaý úshin qoldanylady. Jańa standarttyń arqasynda tsement óniminiń óndirisi 1,5 ese artty. Dál osyndaı jumys tas óńdeý, panelder men polımerlik qubyrlar boıynsha júrgizildi. Agrarlyq sektorda «Halal» standarttardy engize otyryp, otandyq et óniminiń eksporty eki jylda 50 paıyzǵa ósip, shamamen 170 mln AQSh dollaryna jetti, - dedi A.Shaqqalıev.
Onyń aıtýynsha, taýarlardy tolyq qadaǵalaý úshin ulttyq taýarlar katalogynyń bazasynda «Saýdanyń tsıfrlyq aınasy» biryńǵaı tsıfrlyq júıesi qalyptastyrylyp jatyr. Ulttyq taýarlar katalogyna 85 myń taýar men kórsetiletin qyzmet túri engizilgen, 67,7 myń paıdalanýshy tirkelgen jáne 30 mln taýar tsıfrlandyrylǵan.
- Ulttyq katalog memlekettik satyp alý portalymen, elektrondyq shot-faktýralar, kedendik, «1S» júıesimen, sondaı-aq saýda jelilerimen jáne marketpleıstermen ıntegratsııalanǵan. Otandyq taýar óndirýshilerdiń tizilimimen ıntegratsııalaý aıaqtalýǵa jaqyn. Osynyń nátıjesinde biz qazaqstandyq taýarlardyń tolyqqandy derekqoryn qalyptastyramyz. Bul taýarlar qozǵalysy, baǵa dınamıkasy, ishki naryqtaǵy otandyq ónimniń úlesi týraly obektıvti aqparat alýǵa jáne memlekettik qoldaý sharalaryn ataýly túrde qoldanýǵa múmkindik beredi. Prototıp ázirlendi, ony ónerkásipte paıdalanýǵa engizý daıyndyǵy júrgizilip jatyr, - dedi vedomstvo basshysy.
Buǵan deıin habarlanǵandaı, jarty jylda ishki taýar aınalymynyń kólemi 36,2 trln teńge boldy.
