Hákim Abaı ýaqyttan táýelsiz tulǵa - Baýyrjan Qaraǵyzuly

NUR-SULTAN. QazAqparat – Aqyn Baýyrjan Qaraǵyzuly Memleket basshysy Qasym-Jomart Toqaevtyń «Abaı - rýhanı reformator» atty maqalasyna qatysty pikir bildirdi, dep habarlaıdy QazAqparat tilshisi.

«Іzgiliktiń nury degenimiz – shynaıylyq. Shynaıylyq júrgen jerde qudiret qarapaıym ǵana qalpymen sizge kelip, ıilip sálem beredi. Siz sol sálemdi qalaı qabyldaısyz? Áńgime sol jerde.

Men úshin shynaıy sóz – shyrqyraǵan myń pafostan artyq. Qazaq baladaı qýansa da, danadaı qamyqsa da uly Abaıdyń shynaıy sózderine jolyǵady. Shyndyq pen shynaıylyq daýysynan óziniń jan-dúnıesiniń esimin estıdi. Biz sodyqtan uly Abaıdy ustaz tutamyz, sondyqtan qadir-qasıetimizge balaımyz. Áýlıe tutamyz!», - deıdi Baýyrjan Qaraǵyzuly.

Ol memleket basshysy Úkimetke tapsyrma berip, 10 tamyz - Abaı kúni dep belgilengeni úshin qatty qýanǵanyn aıtty.

«Shynyn aıtaıyn, aınalańdy aty jaman dert úreıimen úrkitken ýaqytta, el Prezıdeti Úkimetke tapsyrma berip 10 tamyz – «Abaı kúni» dep belgiletip, merekeler tizbesine qosyp, ulttyq ıdeologııanyń altyn ustyny retinde baǵalap, birneshe ret arnaıy maqala jazyp, memlekettik deńgeıde ǵulamany álemge tanytý jolynda naqty qadamdar jasap jatqany qarapaıym qazaq retinde, aqyn retinde meni shyn qýantady.

Abaı bizdi urynshaq urannan qutqarady, sabyrly aqylǵa júgindiredi. Hákim ýaqyttan táýelsiz tulǵa. Ýaqyttyń qaı núktesinde de bizdiń qasymyzda.

Abaıdyń týǵan kúni Rýhymyzǵa dem bersin, Dátimizge qýat bersin! Sózimizge des bersin, Es bersin! Abaı kúni qutty bolsyn!», - deıdi aqyn.