Haqyly ma, quqyly ma — Erlan Qarın Konstıtýtsııa mátininde birizdendiriletin termınderdi atady

ASTANA. KAZINFORM — Memlekettik keńesshi Erlan Qarın jańa Konstıtýtsııanyń jobasynda eskirgen, maǵynasy ózgergen sózder qaıta qaralǵanyn aıtty.

— Eskirgen, maǵynasy ózgergen nemese tabıǵaty durys ashylmaǵan sózder qaıta qaraldy. Buǵan deıingi otyrystarda jekelegen baptar týraly aıtqanda osy máselege az-kem toqtalǵan edim. Qazirgi Ata Zańda kezinde qoldanylǵan, qazir umyt bola bastaǵan «memlekettik qaýipsizdik», «telegraf», «tektik-toptyq arazdyq» sekildi termınder bolatyn. Ol jóninde sizderge ótken joly aıtqan edim. Sonyń bir mysaly — «memlekettik qaýipsizdik» degen sóz tirkesi. Ol Keńes dáýirinde keńinen qoldanylǵan sóz tirkesteriniń biri. Qazir mundaı termın múldem qoldanylmaıdy. Onyń ornyna kóp jyldan beri «ulttyq qaýipsizdik» degen sóz tirkesin, ataýdy qoldanyp júrmiz, — dedi ol.

Erlan Qarın 1995 jyly qabyldanǵan Ata zańda «tosqaýyldarǵa turýǵa» degen sóz tirkesi kezdesetinin atap ótti.

 — Muny kóbi túsinbeı jatady. Qoldanystaǵy zańda osy tirkes «pıket ótkizýge» degen maǵyna berý kerek edi. Sol sebepten jańa mátinde solaı dep ózgerttik. «Haqyly», «haqysy joq» degen sózder qazir mundaı formada aıtylmaıdy. Sol sebepti, «quqyly, quqyǵy bar», «quqyly emes, quqyǵy joq» dep jazyldy. Sonymen qatar, qazaq tilinde qate qoldanylyp júrgen «bolyp tabylady» degen sóz tirkesi barlyq jerden alynyp tastaldy. Ótken aptada jarııalanǵan jańa mátindi jetildirý jumystary jalǵasady, ıaǵnı, jańa Konstıtýtsııanyń memlekettik tildegi mátini negizinde Ata Zańnyń orys tilindegi nusqasyn da sáıkestendiremiz, — dedi Memlekettik keńesshi.

Aıta keteıik, jańa Konstıtýtsııanyń jobasyn túrli mekemeler, ujymdar talqylap jatyr.